2023 йил 20 январь куни Ўзбекистон Республикаси Президентининг “Ички ишлар органларини халқчил профессионал тузилмага айлантириш ва аҳоли билан янада яқин ҳамкорликда ишлашга йўналтириш бўйича қўшимча чора-тадбирлар тўғрисида”ги ПҚ-10-сон Қарори қабул қилинди.

Қарорга асосан, ички ишлар органларида кадрлар билан ишлаш тизимини янада такомиллаштириш мақсадида:

ички ишлар органларида хизматга қабул қилиш бўйича номзодларни танлашнинг адолатли, холис ва шаффоф тизимини яратиб, ўрнатилган тартибларни тубдан  соддалаштириш ва бюрократик тўсиқларни бартараф этишга қаратилган комплекс чора-тадбирларни белгилаш;

инсон омилини истисно этиш ҳамда коррупция ҳолатларининг барвақт олдини олиш мақсадида ички ишлар органларида кадрлар билан ишлаш, хизматни ўташ қоидаларига риоя этилишини таъминлаш, шунингдек, шахсий таркиб ва уларнинг оила аъзоларини ижтимоий ҳимоя қилиш тизимини замон талабларига мос равишда тўлиқ рақамлаштириш каби вазифалар ушбу соҳадаги устувор йўналишлар этиб белгиланди.

Жумладан, Ички ишлар вазирлигига 2023 йил якунига қадар мансаб лавозимларини юқори маънавий-ахлоқий, ишчанлик ва касбий сифатларга эга номзодлар билан тўлдиришни назарда тутган ҳолда, хизматга қабул қилишнинг сифат жиҳатдан янги, соддалаштирилган тартибини ўрнатиш ҳамда “E-nomzod” электрон ахборот тизимини яратиш вазифаси юклатилди.

Ички ишлар органлари фаолияти устидан жамоатчилик назорати тизимини яратиш мақсадида Ички ишлар вазирлиги ва унинг ҳудудий бўлинмаларида жамоатчилик асосида доимий фаолият юритувчи маслаҳат-кенгаш органи ҳисобланган, соҳа олимлари, фахрийлари ва журналистлардан иборат жамоатчилик кенгашлари тузилиши белгиланди.              

 Қарор билан Ички ишлар органлари ходимларининг касбий маданият ва хизмат интизоми кодекси тасдиқланди.

Ушбу Кодексга ички ишлар органлари тизимида коррупция, тамагирлик, манфаатлар тўқнашувини олдини олиш, фаолиятнинг очиқлиги ва шаффофлигини таъминлашга қаратилган муҳим қоидалар киритилган.

Хусусан, Кодекснинг 5-бандида ходимлар хизмат мажбуриятини бажаришга тўсқинлик қиладиган ёки уларни бажаришда бирон-бир шахсий, мулкий ёки бошқа манфаатларга дахлдор бўлиши мумкин бўлган ҳаракатлар (ҳаракатсизлик)дан  ўзини тийиш, гуруҳбозлик, маҳаллийчилик, таниш-билишчилик кўринишларига йўл қўймаслик каби амал қилиши мажбурий бўлган касбий маданият қоидалари белгиланган.

Кодекс талабларига асосан, ходимлар коррупциянинг ҳар қандай кўринишига қарши курашиши ва унинг профилактикасига фаоллик билан кўмаклашиши шарт эканлиги кўрсатиб ўтилган.

Ходимлар ўз бошлиғи ёки ваколатлари органларга ўзларини бошқа шахслар ҳуқуқбузарлик содир этишга ундаб мурожаат қилган ҳар бир ҳолат, шунингдек, бошқа ходимлар томонидан содир этилган ҳар қандай ўзига маълум бўлган ҳуқуқбузарликлар ҳақида хабар бериши зарурлиги қайд этилган.

Бундан ташқари, ички ишлар органлари ходимларига мансаб ваколатларини сиёсий партиялар, жамоат бирлашмалари ва уларнинг органлари манфаатлари йўлида амалга ошириши ҳамда тадбиркорлик фаолияти билан шуғулланишлари тақиқланмоқда.

Соҳа ходимларига хизмат ваколатларини жисмоний ва юридик шахслар манфаатларини кўзлаб бажариш ёки бажармаслик эвазига улардан ҳар қандай совғалар ҳамда ҳар қандай кўринишдаги моддий бойликларни олиш ёхуд уларнинг хизматларидан фойдаланиш ҳам тақиқланмоқда.

Ходимлар томонидан Кодексдаги қоидалар ва талабларга амал қилмаслик ёки уларни қўпол равишда бузиш ходимни ички ишлар органларидан хизматдан бўшатишгача бўлган интизомий жазо чорасини қўллашга асос бўлиши белгилаб қўйилган.

Коррупцияга қарши курашиш агентлиги Ахборот хизмати