2023-yil 20-yanvar kuni O‘zbekiston Respublikasi Prezidentining “Ichki ishlar organlarini xalqchil professional tuzilmaga aylantirish va aholi bilan yanada yaqin hamkorlikda ishlashga yo‘naltirish bo‘yicha qo‘shimcha chora-tadbirlar to‘g‘risida”gi PQ-10-son Qarori qabul qilindi.

Qarorga asosan, ichki ishlar organlarida kadrlar bilan ishlash tizimini yanada takomillashtirish maqsadida:

ichki ishlar organlarida xizmatga qabul qilish bo‘yicha nomzodlarni tanlashning adolatli, xolis va shaffof tizimini yaratib, o‘rnatilgan tartiblarni tubdan soddalashtirish va byurokratik to‘siqlarni bartaraf etishga qaratilgan kompleks chora-tadbirlarni belgilash;

inson omilini istisno etish hamda korrupsiya holatlarining barvaqt oldini olish maqsadida ichki ishlar organlarida kadrlar bilan ishlash, xizmatni o‘tash qoidalariga rioya etilishini ta’minlash, shuningdek, shaxsiy tarkib va ularning oila a’zolarini ijtimoiy himoya qilish tizimini zamon talablariga mos ravishda to‘liq raqamlashtirish kabi vazifalar ushbu sohadagi ustuvor yo‘nalishlar etib belgilandi.

Jumladan, Ichki ishlar vazirligiga 2023-yil yakuniga qadar mansab lavozimlarini yuqori ma’naviy-axloqiy, ishchanlik va kasbiy sifatlarga ega nomzodlar bilan to‘ldirishni nazarda tutgan holda, xizmatga qabul qilishning sifat jihatdan yangi, soddalashtirilgan tartibini o‘rnatish hamda “E-nomzod” elektron axborot tizimini yaratish vazifasi yuklatildi.

Ichki ishlar organlari faoliyati ustidan jamoatchilik nazorati tizimini yaratish maqsadida Ichki ishlar vazirligi va uning hududiy bo‘linmalarida jamoatchilik asosida doimiy faoliyat yurituvchi maslahat-kengash organi hisoblangan, soha olimlari, faxriylari va jurnalistlardan iborat jamoatchilik kengashlari tuzilishi belgilandi.             

 Qaror bilan Ichki ishlar organlari xodimlarining kasbiy madaniyat va xizmat intizomi kodeksi tasdiqlandi.

Ushbu Kodeksga ichki ishlar organlari tizimida korrupsiya, tamagirlik, manfaatlar to‘qnashuvini oldini olish, faoliyatning ochiqligi va shaffofligini ta’minlashga qaratilgan muhim qoidalar kiritilgan.

Xususan, Kodeksning 5-bandida xodimlar xizmat majburiyatini bajarishga to‘sqinlik qiladigan yoki ularni bajarishda biron-bir shaxsiy, mulkiy yoki boshqa manfaatlarga daxldor bo‘lishi mumkin bo‘lgan harakatlar (harakatsizlik)dan  o‘zini tiyish, guruhbozlik, mahalliychilik, tanish-bilishchilik ko‘rinishlariga yo‘l qo‘ymaslik kabi amal qilishi majburiy bo‘lgan kasbiy madaniyat qoidalari belgilangan.

Kodeks talablariga asosan, xodimlar korrupsiyaning har qanday ko‘rinishiga qarshi kurashishi va uning profilaktikasiga faollik bilan ko‘maklashishi shart ekanligi ko‘rsatib o‘tilgan.

Xodimlar o‘z boshlig‘i yoki vakolatlari organlarga o‘zlarini boshqa shaxslar huquqbuzarlik sodir etishga undab murojaat qilgan har bir holat, shuningdek, boshqa xodimlar tomonidan sodir etilgan har qanday o‘ziga ma’lum bo‘lgan huquqbuzarliklar haqida xabar berishi zarurligi qayd etilgan.

Bundan tashqari, ichki ishlar organlari xodimlariga mansab vakolatlarini siyosiy partiyalar, jamoat birlashmalari va ularning organlari manfaatlari yo‘lida amalga oshirishi hamda tadbirkorlik faoliyati bilan shug‘ullanishlari taqiqlanmoqda.

Soha xodimlariga xizmat vakolatlarini jismoniy va yuridik shaxslar manfaatlarini ko‘zlab bajarish yoki bajarmaslik evaziga ulardan har qanday sovg‘alar hamda har qanday ko‘rinishdagi moddiy boyliklarni olish yoxud ularning xizmatlaridan foydalanish ham taqiqlanmoqda.

Xodimlar tomonidan Kodeksdagi qoidalar va talablarga amal qilmaslik yoki ularni qo‘pol ravishda buzish xodimni ichki ishlar organlaridan xizmatdan bo‘shatishgacha bo‘lgan intizomiy jazo chorasini qo‘llashga asos bo‘lishi belgilab qo‘yilgan.