Коррупцияга қарши курашиш агентлиги томонидан бюджет буюртмачилари томонидан махсус ахборот порталлари орқали амалга оширилаётган давлат харидларига оид эълонлар доимий равишда ўрганиб борилмоқда.

Вазирлик ва идоралар томонидан 2022 йилнинг декабрь ойида жами
10,5 трлн. сўмлик 132 130 та давлат харидлари амалга оширилган бўлиб, шундан 607,32 млрд. сўмлик 79 622 та харидлар электрон дўкон, 81,94 млрд. сўмлик 3 374 та харидлар электрон аукцион, 1592,84 млрд. сўмлик 5 782та харидлар энг яхши таклифни танлаш, 1397,60 млрд. сўмлик 404 та харидлар тендер, 2 443,18 млрд. сўмлик 8 496 та харидлар ягона етказиб берувчилар билан, 4 452,89 млрд. сўмлик 34 452 та харидлар тўғридан-тўғри шаклда амалга оширилган.

Шу билан бирга, ўрганишларда айрим давлат буюртмачилари томонидан давлат харидларини амалга оширишда қонунбузилиш ҳолатларига йўл қўйилаётганлиги аниқланмоқда.

2022 йилнинг декабрь ойида Агентлик томонидан жами 3,3 млрд. сўмлик қонунбузилиш ҳолатларини бартараф қилиш ҳамда келгусида шу каби ҳолатларига йўл қўймаслик ҳақида буюртмачиларга 3 та тақдимнома киритилган.

Шу билан бирга, мониторинг ва ўрганишларда давлат буюртмачилари томонидан давлат харидларини амалга оширишда 3 та ҳолатда 9,9 млрд. сўмлик қонунбузилиш ҳолатларига йўл қўйилганлиги аниқланиб, тўпланган ҳужжатлар ҳуқуқни муҳофаза қилувчи органларга юборилган.

Жумладан, Андижон шаҳар ҳокимлиги буюртмачилигида махсус ахборот порталига жойлаштирилган 300 млн. сўмлик “Электр жиҳозларини харид қилиш” бўйича энг яхши таклифларни танлаш юзасидан берилган эълон ўрганилганида мазкур давлат харидида ўзаро аффилланган шахсларга тегишли тадбиркорлик субъектлари иштирок этиб, ғолибликни қўлга киритганлиги аниқланган.

Шу каби, Андижон шаҳар ҳокимлиги буюртмачилигида махсус ахборот порталига жойлаштирилган 130,0 млн. сўмлик “Қурилиш-монтаж ишларида транспорт хизмати кўрсатиш” юзасидан берилган эълон бўйича давлат харидида ҳам ўзаро аффилланган шахсларга тегишли тадбиркорлик субъектлари иштирок этиб, ғолибликни қўлга киритганлиги аниқланган.

Бироқ, харид комиссияси томонидан ўзаро аффилланган шахслар харид қилиш тартиб-таомилларида иштирок этишдан четлатилмасдан Ўзбекистон Республикаси “Давлат харидлари тўғрисида”ги Қонуннинг 42-моддаси ва “Рақобат тўғрисида”ги Қонунининг 14-моддаси талаблари бузилганлиги аниқланиб, тўпланган ҳужжатлар ҳуқуқий баҳо бериш учун
Бош прокуратурага юборилди.


Коррупцияга қарши курашиш агентлиги