Korrupsiyaga qarshi kurashish agentligi tomonidan byudjet buyurtmachilari tomonidan maxsus axborot portallari orqali amalga oshirilayotgan davlat xaridlariga oid eʼlonlar doimiy ravishda o‘rganib borilmoqda.

Vazirlik va idoralar tomonidan 2022-yilning dekabr oyida jami
10,5 trln. so‘mlik 132 130 ta davlat xaridlari amalga oshirilgan bo‘lib, shundan 607,32 mlrd. so‘mlik 79 622 ta xaridlar elektron do‘kon, 81,94 mlrd. so‘mlik 3 374 ta xaridlar elektron auksion, 1592,84 mlrd. so‘mlik 5 782ta xaridlar eng yaxshi taklifni tanlash, 1397,60 mlrd. so‘mlik 404 ta xaridlar tender, 2 443,18 mlrd. so‘mlik 8 496 ta xaridlar yagona yetkazib beruvchilar bilan, 4 452,89 mlrd. so‘mlik 34 452 ta xaridlar to‘g‘ridan-to‘g‘ri shaklda amalga oshirilgan.

Shu bilan birga, o‘rganishlarda ayrim davlat buyurtmachilari tomonidan davlat xaridlarini amalga oshirishda qonunbuzilish holatlariga yo‘l qo‘yilayotganligi aniqlanmoqda.

2022-yilning dekabr oyida Agentlik tomonidan jami 3,3 mlrd. so‘mlik qonunbuzilish holatlarini bartaraf qilish hamda kelgusida shu kabi holatlariga yo‘l qo‘ymaslik haqida buyurtmachilarga 3 ta taqdimnoma kiritilgan.

Shu bilan birga, monitoring va o‘rganishlarda davlat buyurtmachilari tomonidan davlat xaridlarini amalga oshirishda 3 ta holatda 9,9 mlrd. so‘mlik qonunbuzilish holatlariga yo‘l qo‘yilganligi aniqlanib, to‘plangan hujjatlar huquqni muhofaza qiluvchi organlarga yuborilgan.

Jumladan, Andijon shahar hokimligi buyurtmachiligida maxsus axborot portaliga joylashtirilgan 300 mln. so‘mlik “Elektr jihozlarini xarid qilish” bo‘yicha eng yaxshi takliflarni tanlash yuzasidan berilgan eʼlon o‘rganilganida mazkur davlat xaridida o‘zaro affillangan shaxslarga tegishli tadbirkorlik subyektlari ishtirok etib, g‘oliblikni qo‘lga kiritganligi aniqlangan.

Shu kabi, Andijon shahar hokimligi buyurtmachiligida maxsus axborot portaliga joylashtirilgan 130,0 mln. so‘mlik “Qurilish-montaj ishlarida transport xizmati ko‘rsatish” yuzasidan berilgan eʼlon bo‘yicha davlat xaridida ham o‘zaro affillangan shaxslarga tegishli tadbirkorlik subyektlari ishtirok etib, g‘oliblikni qo‘lga kiritganligi aniqlangan.

Biroq, xarid komissiyasi tomonidan o‘zaro affillangan shaxslar xarid qilish tartib-taomillarida ishtirok etishdan chetlatilmasdan O‘zbekiston Respublikasi “Davlat xaridlari to‘g‘risida”gi Qonunning 42-moddasi va “Raqobat to‘g‘risida”gi Qonunining 14-moddasi talablari buzilganligi aniqlanib, to‘plangan hujjatlar huquqiy baho berish uchun
Bosh prokuraturaga yuborildi.

Korrupsiyaga qarshi kurashish agentligi