Коррупцияга қарши курашиш агентлиги томонидан масофавий мониторинг,  шунингдек, ОАВ ва ижтимоий тармоқларда хабарлар орқали доимий ўрганиш ўтказиб келинмоқда. Ўрганишларда давлат харидларига қатор қонунбузилиш ҳолатлари аниқланмоқда.
 Жумладан, “Намангандонмаҳсулотлари” АЖ буюртмачилигида 2023 йил 27 январь куни 224608-сонли лот бўйича ўтказилган 200,0 млн.сўмлик давлат харидида Ўзбекистон Республикаси “Давлат харидлари тўғрисида”ги Қонунининг 10, 14, 23 ва 42-моддалари  ҳамда “Рақобат тўғрисида”ги Қонун талаблари бузилган ҳолда харидда иштирок этган “T.A.”, “A.L.” ва “S.A.” МЧЖларнинг раҳбари бир шахс бўлганлиги ҳолати яққол кўриниб турган бўлса-да, харид комиссияси томонидан ушбу иштирокчиларни четлатиш чоралари кўрилмаган.

Шу каби “Тошкент иссиқлик маркази” унитар корхонаси буюртмачилигида 2023 йил 28 январь куни 222662-сонли лот билан электр двигателларни капитал таъмирлаш учун ўтказилган 2,4 млрд. сўмлик давлат харидида иштирок этган 3 та субъектдан 2 таси, жумладан, Тошкент шаҳридаги “M.” ва “E.S” МЧЖларнинг таъсисчиси ҳам бир шахсга тегишли эканлиги ҳолати юзасидан харид комиссияси томонидан уларни четлатиш чоралари кўрилмаганлиги маълум бўлди.

Худди шундай, Чуст туман Тиббиёт бирлашмаси буюртмачилигида 2023 йил 27 январь куни 222920-сонли лот бўйича 57,5 млн. сўмлик тиббиёт тарозисини сотиб олиш учун ўтказилган давлат харидида ҳам Наманган шаҳридаги раҳбари ва таъсисчиси айнан бир шахс бўлган “B.M.” ва “G” МЧЖлар  иштирок этиб, қонунбузилишларга йўл қўйилган.

Шунингдек, Жиззах вилоят тери-таносил касалликлари диспансери буюртмачилигида 2023 йил 26-27 январь куни 224253 ва 224395-сонли лотлар бўйича ўтказилган жами 33,2 млн.сўмлик давлат харидларида иштирок этган Зарбдор туманидаги  “T.M.P.” ва “T.S” МЧЖларнинг раҳбар ва таъсисчиси бир кишига тегишли эканлигига  қарамай, харид комиссияси томонидан ушбу ҳолатларга баҳо берилмаган.

Қайд этиш лозимки,  юқорида келтирилган давлат харидлардаги қонунбузилишлар юзасидан “Намангандонмаҳсулотлари” АЖ, Чуст туман Тиббиёт бирлашмаси, “Тошкент иссиқлик маркази” унитар корхонаси ва Жиззах вилоят тери-таносил касалликлари диспансерига Харид комиссиясининг баённомасини бекор қилиш бўйича 2023 йил 30 январь куни Агентлик томонидан тақдимномалар киритилди.

Бундан ташқари, шу куннинг ўзида қонунбузилиш ҳолатларига ҳуқуқий баҳо бериш учун тўпланган материаллар Бош прокуратурага юборилди.