Korrupsiyaga qarshi kurashish agentligi tomonidan masofaviy monitoring,  shuningdek, OAV va ijtimoiy tarmoqlarda xabarlar orqali doimiy o‘rganish o‘tkazib kelinmoqda. O‘rganishlarda davlat xaridlariga qator qonunbuzilish holatlari aniqlanmoqda.
 Jumladan, “Namangandonmahsulotlari” AJ buyurtmachiligida 2023 yil 27 yanvar kuni 224608-sonli lot bo‘yicha o‘tkazilgan 200,0 mln.so‘mlik davlat xaridida O‘zbekiston Respublikasi “Davlat xaridlari to‘g‘risida”gi Qonunining 10, 14, 23 va 42-moddalari  hamda “Raqobat to‘g‘risida”gi Qonun talablari buzilgan holda xaridda ishtirok etgan “T.A.”, “A.L.” va “S.A.” MCHJlarning rahbari bir shaxs bo‘lganligi holati yaqqol ko‘rinib turgan bo‘lsa-da, xarid komissiyasi tomonidan ushbu ishtirokchilarni chetlatish choralari ko‘rilmagan.

Shu kabi “Toshkent issiqlik markazi” unitar korxonasi buyurtmachiligida 2023 yil 28 yanvar kuni 222662-sonli lot bilan elektr dvigatellarni kapital ta’mirlash uchun o‘tkazilgan 2,4 mlrd. so‘mlik davlat xaridida ishtirok etgan 3 ta subyektdan 2 tasi, jumladan, Toshkent shahridagi “M.” va “E.S” MCHJlarning ta’sischisi ham bir shaxsga tegishli ekanligi holati yuzasidan xarid komissiyasi tomonidan ularni chetlatish choralari ko‘rilmaganligi ma’lum bo‘ldi.

Xuddi shunday, Chust tuman Tibbiyot birlashmasi buyurtmachiligida 2023 yil 27 yanvar kuni 222920-sonli lot bo‘yicha 57,5 mln. so‘mlik tibbiyot tarozisini sotib olish uchun o‘tkazilgan davlat xaridida ham Namangan shahridagi rahbari va ta’sischisi aynan bir shaxs bo‘lgan “B.M.” va “G” MCHJlar  ishtirok etib, qonunbuzilishlarga yo‘l qo‘yilgan.

Shuningdek, Jizzax viloyat teri-tanosil kasalliklari dispanseri buyurtmachiligida 2023 yil 26-27 yanvar kuni 224253 va 224395-sonli lotlar bo‘yicha o‘tkazilgan jami 33,2 mln.so‘mlik davlat xaridlarida ishtirok etgan Zarbdor tumanidagi  “T.M.P.” va “T.S” MCHJlarning rahbar va ta’sischisi bir kishiga tegishli ekanligiga  qaramay, xarid komissiyasi tomonidan ushbu holatlarga baho berilmagan.

Qayd etish lozimki,  yuqorida keltirilgan davlat xaridlardagi qonunbuzilishlar yuzasidan “Namangandonmahsulotlari” AJ, Chust tuman Tibbiyot birlashmasi, “Toshkent issiqlik markazi” unitar korxonasi va Jizzax viloyat teri-tanosil kasalliklari dispanseriga Xarid komissiyasining bayonnomasini bekor qilish bo‘yicha 2023 yil 30 yanvar kuni Agentlik tomonidan taqdimnomalar kiritildi.

Bundan tashqari, shu kunning o‘zida qonunbuzilish holatlariga huquqiy baho berish uchun to‘plangan materiallar Bosh prokuraturaga yuborildi.