Ўзбекистон Республикаси Президентининг 2022 йил 8 августдаги қарори билан Европа тикланиш ва тараққиёт банки иштирокида 2 та лойиҳани амалга ошириш белгиланган эди.

Хусусан, “Наманган вилояти Чуст, Поп ва Наманган туманлари ичимлик сув таъминотини яхшилаш ҳамда Чуст ва Мингбулоқ туманлари марказларида оқова сув тизимларини қуриш” лойиҳаси доирасида Наманган вилояти Чуст, Поп ва наманган туманларида - 12 500 м3/сутка қувватли оқова сув тозалаш иншоотини қуриш, 20 та сув иншоотини реконструкция қилиш, 77 км ичимлик сув тармоқларини қуриш, 104 км сув тармоқларини реконструкция қилиш, 52 км оқова сув тармоқларини қуриш, машина ва механизмларни сотиб олиш назарда тутилган (умумий қиймати – 84,5 млн АҚШ доллари).

Шунингдек, «Оқтош» ва «Пошхурт» ер ости сув манбаларидан сув қувури қуриш йўли билан Сурхондарё вилояти Музработ туманининг сув таъминотини яхшилаш” лойиҳаси доирасида 75 км ичимлик суви тизимини қуриш ва реконструкция қилиш;18 та сув тақсимлаш иншоотини қуриш ва жиҳозлаш ҳамда лаборатория ва назорат биносини қуриш назарда тутилган (умумий қиймати – 60,3 млн АҚШ доллари).

«Ўзсувтаъминот» АЖ лойиҳалар доирасида ажратиладиган маблағларининг мақсадли ва самарали сарфланиши ҳамда лойиҳаларнинг ўз вақтида ва сифатли амалга оширилиши учун масъул ижро этувчи орган сифатида белгиланган.

Агентлик томонидан мазкур лойиҳани амалга ошириш жараёнларида очиқлик ва ошкораликни таъминлаш юзасидан доимий мониторинг тадбирлари амалга оширилиб борилмоқда.

Хусусан, 2022 йилнинг декабрь ойида лойиҳалар юзасидан “Ўзсувтаъминотнинг расмий веб-сайтида лойиҳалар тўғрисида батафсил маълумотлар, лойиҳа мақсади, умумий қиймати, молиялаштириш режаси, асосий техник-иқтисодий кўрсаткичлар, лойиҳа доирасида амалга оширилган ишлар ҳолати, лойиҳани амалга ошириш доирасида қабул қилинган ҳужжатлар, ўтказилган тендер ва танловлар тўғрисидаги маълумотлар жойлаштирилиши ўрганилди.

«Ўзсувтаъминот» АЖ расмий веб-сайтида лойиҳалар учун алоҳида саҳифалар ташкил этилган бўлиб (Наманган лойиҳаси учун, Сурхондарё лойиҳаси учун ), мазкур саҳифаларда лойиҳалар тўғрисида умумий малумотлар, ҳудудлар кесимида амалга оширилган ишлар, режалаштирилган ишлар, инвестицияларни ўзлаштириш ҳолати, имзоланган шартномалар, қурилиш-монтаж ишлари тўғрисида маълумот киритилган.

Шунингдек, мониторинг натижалари бўйича Агентлик томонидан лойиҳалар доирасида маблағлар сарфланишини очиқлаш бўйича тавсиялар «Ўзсувтаъминот» АЖ га юборилди.

Ўзбекистон Республикаси Президентининг 2018 йил 16 июлдаги ПҚ-3857-сон қарорига асосан халқаро молия институтлари ва хорижий ҳукумат молия ташкилотлари иштирокидаги лойиҳалар доирасида харид комиссияларига Агентлик вакили ҳам киритилиши белгиланган бўлиб, ўтказиладиган тендер ва танловларда Агентлик вакиллари иштироки таъминланади.

Агентлик томонидан лойиҳалар доирасида ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан назорат ишлари давом эттирилади.

Коррупцияга қарши курашиш агентлиги

Ахборот хизмати