O‘zbekiston Respublikasi Prezidentining 2022-yil 8-avgustdagi qarori bilan Yevropa tiklanish va taraqqiyot banki ishtirokida 2 ta loyihani amalga oshirish belgilangan edi.

Xususan, “Namangan viloyati Chust, Pop va Namangan tumanlari ichimlik suv ta’minotini yaxshilash hamda Chust va Mingbuloq tumanlari markazlarida oqova suv tizimlarini qurish” loyihasi doirasida Namangan viloyati Chust, Pop va namangan tumanlarida - 12 500 m3/sutka quvvatli oqova suv tozalash inshootini qurish, 20 ta suv inshootini rekonstruksiya qilish, 77 km ichimlik suv tarmoqlarini qurish, 104 km suv tarmoqlarini rekonstruksiya qilish, 52 km oqova suv tarmoqlarini qurish, mashina va mexanizmlarni sotib olish nazarda tutilgan (umumiy qiymati – 84,5 mln AQSh dollari).

Shuningdek, “Oqtosh” va “Poshxurt” yer osti suv manbalaridan suv quvuri qurish yo‘li bilan Surxondaryo viloyati Muzrabot tumanining suv ta’minotini yaxshilash” loyihasi doirasida 75 km ichimlik suvi tizimini qurish va rekonstruksiya qilish;18 ta suv taqsimlash inshootini qurish va jihozlash hamda laboratoriya va nazorat binosini qurish nazarda tutilgan (umumiy qiymati – 60,3 mln AQSh dollari).

“O‘zsuvta’minot” AJ loyihalar doirasida ajratiladigan mablag‘larining maqsadli va samarali sarflanishi hamda loyihalarning o‘z vaqtida va sifatli amalga oshirilishi uchun mas’ul ijro etuvchi organ sifatida belgilangan.

Agentlik tomonidan mazkur loyihani amalga oshirish jarayonlarida ochiqlik va oshkoralikni ta’minlash yuzasidan doimiy monitoring tadbirlari amalga oshirilib borilmoqda.

Xususan, 2022-yilning dekabr oyida loyihalar yuzasidan “O‘zsuvta’minotning rasmiy veb-saytida loyihalar to‘g‘risida batafsil ma’lumotlar, loyiha maqsadi, umumiy qiymati, moliyalashtirish rejasi, asosiy texnik-iqtisodiy ko‘rsatkichlar, loyiha doirasida amalga oshirilgan ishlar holati, loyihani amalga oshirish doirasida qabul qilingan hujjatlar, o‘tkazilgan tender va tanlovlar to‘g‘risidagi ma’lumotlar joylashtirilishi o‘rganildi.

“O‘zsuvta’minot” AJ rasmiy veb-saytida loyihalar uchun alohida sahifalar tashkil etilgan bo‘lib (Namangan loyihasi uchun, Surxondaryo loyihasi uchun ), mazkur sahifalarda loyihalar to‘g‘risida umumiy malumotlar, hududlar kesimida amalga oshirilgan ishlar, rejalashtirilgan ishlar, investitsiyalarni o‘zlashtirish holati, imzolangan shartnomalar, qurilish-montaj ishlari to‘g‘risida ma’lumot kiritilgan.

Shuningdek, monitoring natijalari bo‘yicha Agentlik tomonidan loyihalar doirasida mablag‘lar sarflanishini ochiqlash bo‘yicha tavsiyalar “O‘zsuvta’minot” AJ ga yuborildi.

O‘zbekiston Respublikasi Prezidentining 2018-yil 16-iyuldagi PQ-3857-son Qaroriga asosan xalqaro moliya institutlari va xorijiy hukumat moliya tashkilotlari ishtirokidagi loyihalar doirasida xarid komissiyalariga Agentlik vakili ham kiritilishi belgilangan bo‘lib, o‘tkaziladigan tender va tanlovlarda Agentlik vakillari ishtiroki ta’minlanadi.

Agentlik tomonidan loyihalar doirasida ajratilgan mablag‘larning maqsadli ishlatilishi jarayonida ochiqlik va oshkoralikni ta’minlash ustidan nazorat ishlari davom ettiriladi.

Korrupsiyaga qarshi kurashish agentligi

Axborot xizmati