Жорий йилнинг 9 февраль куни Қирғизистон Республикаси пойтахти Бишкек шаҳрида Коррупцияга қарши кураш: рақамлаштириш шароитида сиёсий ва ҳуқуқий ёрдам, халқаро ва миллий стандартлар, таҳдидлар, муаммолар ва уларнинг Марказий Осиё давлатлари миллий хавфсизлигига таъсири” мавзусидаги халқаро илмий-амалий конференцияси бўлиб ўтди.

Унда Қирғизистон Республикаси Президенти ҳузуридаги Коррупцияга қарши курашиш ишчи кенгашининг таклифига кўра Агентлик вакили иштирок этди.

Конференция Қирғизистон Республикаси Президенти ҳузуридаги Коррупцияга қарши курашиш ишчи кенгаши томонидан Конрад Аденаур жамғармаси кўмагида ташкиллаштирилди.

Унда Қирғизистон Республикаси Юқори Кенгаши депутатлари, вазирлик ва идоралар, ҳуқуқни муҳофаза қилувчи органлар, жамоат ва халқаро ташкилотлар, тадқиқот марказлари, илмий-педагогик ҳамжамият ҳамда Қозоғистон Республикаси коррупцияга қарши курашиш агентлиги вакиллари иштирок этдилар.

Конференцияда Қирғизистон Республикасида коррупцияга қарши курашиш борасида мутасадди ташкилотлар томонидан амалга оширилаётган ишлар, мазкур соҳада ахборот технологияларидан фойдаланиш амалиёти, эришилаётган натижалар ҳақидаги маърузалар тингланди. Ўз навбатида Агентлик вакили Ўзбекистон Республикасида коррупцияга қарши курашишнинг превентив механизмларини, хусусан давлат органлари ва ташкилотларида ички назорат тузилмаларини жорий этиш бўйича миллий стандартнинг яратилиши ҳақидаги маъруза билан иштирок этди. 

Республикамизда ички назорат тузилмалари фаолиятини йўлга қўйиш борасида амалга оширилаётган ишлар конференция иштирокчиларида катта қизиқиш уйғотди.

Конференция якунида Қирғизистон Республикаси Президенти ҳузуридаги Коррупцияга қарши курашиш ишчи кенгаши бош котиби томонидан ўзаро тажриба алмашиш, амалий ва услубий ёрдам кўрсатиш мақсадида ҳамкорликни йўлга қўйиш бўйича таклифлар билдирилди.