Joriy yilning 9-fevral kuni Qirg‘iziston Respublikasi poytaxti Bishkek shahrida “Korrupsiyaga qarshi kurash: raqamlashtirish sharoitida siyosiy va huquqiy yordam, xalqaro va milliy standartlar, tahdidlar, muammolar va ularning Markaziy Osiyo davlatlari milliy xavfsizligiga ta’siri” mavzusidagi xalqaro ilmiy-amaliy konferensiyasi bo‘lib o‘tdi.

Unda Qirg‘iziston Respublikasi Prezidenti huzuridagi Korrupsiyaga qarshi kurashish ishchi kengashining taklifiga ko‘ra Agentlik vakili ishtirok etdi.

Konferensiya Qirg‘iziston Respublikasi Prezidenti huzuridagi Korrupsiyaga qarshi kurashish ishchi kengashi tomonidan Konrad Adenaur jamg‘armasi ko‘magida tashkillashtirildi.

Unda Qirg‘iziston Respublikasi Yuqori Kengashi deputatlari, vazirlik va idoralar, huquqni muhofaza qiluvchi organlar, jamoat va xalqaro tashkilotlar, tadqiqot markazlari, ilmiy-pedagogik hamjamiyat hamda Qozog‘iston Respublikasi korrupsiyaga qarshi kurashish agentligi vakillari ishtirok etdilar.

Konferensiyada Qirg‘iziston Respublikasida korrupsiyaga qarshi kurashish borasida mutasaddi tashkilotlar tomonidan amalga oshirilayotgan ishlar, mazkur sohada axborot texnologiyalaridan foydalanish amaliyoti, erishilayotgan natijalar haqidagi ma’ruzalar tinglandi. O‘z navbatida Agentlik vakili O‘zbekiston Respublikasida korrupsiyaga qarshi kurashishning preventiv mexanizmlarini, xususan davlat organlari va tashkilotlarida ichki nazorat tuzilmalarini joriy etish bo‘yicha milliy standartning yaratilishi haqidagi ma’ruza bilan ishtirok etdi. 

Respublikamizda ichki nazorat tuzilmalari faoliyatini yo‘lga qo‘yish borasida amalga oshirilayotgan ishlar konferensiya ishtirokchilarida katta qiziqish uyg‘otdi.

Konferensiya yakunida Qirg‘iziston Respublikasi Prezidenti huzuridagi Korrupsiyaga qarshi kurashish ishchi kengashi bosh kotibi tomonidan o‘zaro tajriba almashish, amaliy va uslubiy yordam ko‘rsatish maqsadida hamkorlikni yo‘lga qo‘yish bo‘yicha takliflar bildirildi.