Жорий йилнинг 10 март куни Коррупцияга қарши курашиш агентлиги директори Акмал Бурханов ва Япония халқаро ҳамкорлик ташкилоти (JICA)нинг Ўзбекистондаги ваколатхонаси раҳбари Миязаки Сугуру ўртасида учрашув бўлиб ўтди.

Учрашувда А.Бурханов мамлакатимизда коррупциянинг олдини олиш ва унга қарши курашиш бўйича давлат сиёсати ва амалга оширилаётган ислоҳотларга қисқача тўхталиб, мазкур йўналишда Япония билан ҳамкорлик ва унинг самараларини алоҳида эътироф этди.

JICA раҳбари, ўз ўрнида, мазкур соҳадаги ўзгариш ва кўрилаётган чораларни юқори баҳолаб, икки давлат ўртасида, шу жумладан, коррупцияга қарши курашиш соҳасида йўлга қўйилган конструктив мулоқот ва ҳамкорликни янада кучайтиришга тайёрлигини билдириб ўтди.

Жумладан, JICA ҳамкорлигида давлат хизмати этикаси ҳамда давлат харидлари тизимини тартибга солиш бўйича Япония тажрибасини ўрганиш, коррупциянинг олдини олиш жараёнига ахборот технологияларини кенг жорий этиш, коррупцияга қарши курашиш сиёсатини шакллантиришда япониялик мутахассисларни жалб этиш масалаларида яқиндан ҳамкорлик ўрнатиш масалалари муҳокама қилинди.

Учрашув сўнггида томонлар коррупциянинг олдини олишга қаратилган қўшма лойиҳалар ва ўқув дастурларини ишлаб чиқиш ҳамда соҳа юзасидан Япония тажрибасини ўрганиш ишларини давом эттиришга келишиб олдилар.

Коррупцияга қарши курашиш агентлиги

Ахборот хизмати