Joriy yilning 10-mart kuni Korrupsiyaga qarshi kurashish agentligi direktori Akmal Burxanov va Yaponiya xalqaro hamkorlik tashkiloti (JICA)ning O‘zbekistondagi vakolatxonasi rahbari Miyazaki Suguru o‘rtasida uchrashuv bo‘lib o‘tdi.

Uchrashuvda A.Burxanov mamlakatimizda korrupsiyaning oldini olish va unga qarshi kurashish bo‘yicha davlat siyosati va amalga oshirilayotgan islohotlarga qisqacha to‘xtalib, mazkur yo‘nalishda Yaponiya bilan hamkorlik va uning samaralarini alohida eʼtirof etdi.

JICA rahbari, o‘z o‘rnida, mazkur sohadagi o‘zgarish va ko‘rilayotgan choralarni yuqori baholab, ikki davlat o‘rtasida, shu jumladan, korrupsiyaga qarshi kurashish sohasida yo‘lga qo‘yilgan konstruktiv muloqot va hamkorlikni yana-da kuchaytirishga tayyorligini bildirib o‘tdi.

Jumladan, JICA hamkorligida davlat xizmati etikasi hamda davlat xaridlari tizimini tartibga solish bo‘yicha Yaponiya tajribasini o‘rganish, korrupsiyaning oldini olish jarayoniga axborot texnologiyalarini keng joriy etish, korrupsiyaga qarshi kurashish siyosatini shakllantirishda yaponiyalik mutaxassislarni jalb etish masalalarida yaqindan hamkorlik o‘rnatish masalalari muhokama qilindi.

Uchrashuv so‘nggida tomonlar korrupsiyaning oldini olishga qaratilgan qo‘shma loyihalar va o‘quv dasturlarini ishlab chiqish hamda soha yuzasidan Yaponiya tajribasini o‘rganish ishlarini davom ettirishga kelishib oldilar.

Korrupsiyaga qarshi kurashish agentligi

Axborot xizmati