Бугун Агентлик ҳамда Тошкент солиқ техникуми ҳамкорлигида мазкур таълим даргоҳида “Ўзбекистон Республикасида коррупцияга қарши курашиш борасидаги давлат сиёсати ва унинг устувор йўналишлари” мавзусида семинар ташкил этилди.

Тадбирда Агентлдик масъул ходими томонидан мамлакатимизда коррупциянинг олдини олиш ва унга қарши курашиш, давлат ва жамият қурилишининг барча соҳаларида коррупциоген омилларга чек қўйишга қаратилган кенг кўламли ислоҳотлар ва уларнинг самараси хусусида батафсил маълумот берилди.

Қайд этилганидек, бугунги кунда давлат органлари ва ташкилотларига коррупцияга қарши курашиш, давлат хизматига ҳалоллик стандартларини жорий этиш бўйича қатор стандартларни ўз фаолиятига жорий этиш юзасидан вазифалар белгилаб берилди. Натижада кўпгина ташкилот ва идораларда коррупцияга қарши ички назорат (комплеанс назорати) тизими фаолияти йўлга қўйилди.

Семинар мобайнида коррупцияни юзага келтирувчи ҳолатлар, уларнинг олдини олиш бўйича олиб борилаётган чора-тадбирлар, коррупция ҳолати натижасида юзага келган жиноятлар оқибати, ушбу ҳолатлар учун белгиланган жазо ва чоралар тўғрисида ҳам атрофлича сўз юритилди.

Мулоқот мобайнида жамиятда коррупцияга қарши муросасизликни кучайтириш, ушбу иллатга қарши курашишда ижтимоий фаолликни ошириш юзасидан фикр-мулоҳаза ва таклифлар билдирилди.

Коррупцияга қарши курашиш агентлиги

Ахборот хизмати