Bugun Agentlik hamda Toshkent soliq texnikumi hamkorligida mazkur taʼlim dargohida “O‘zbekiston Respublikasida korrupsiyaga qarshi kurashish borasidagi davlat siyosati va uning ustuvor yo‘nalishlari” mavzusida seminar tashkil etildi.

Tadbirda Agentldik masʼul xodimi tomonidan mamlakatimizda korrupsiyaning oldini olish va unga qarshi kurashish, davlat va jamiyat qurilishining barcha sohalarida korrupsiogen omillarga chek qo‘yishga qaratilgan keng ko‘lamli islohotlar va ularning samarasi xususida batafsil maʼlumot berildi.

Qayd etilganidek, bugungi kunda davlat organlari va tashkilotlariga korrupsiyaga qarshi kurashish, davlat xizmatiga halollik standartlarini joriy etish bo‘yicha qator standartlarni o‘z faoliyatiga joriy etish yuzasidan vazifalar belgilab berildi. Natijada ko‘pgina tashkilot va idoralarda korrupsiyaga qarshi ichki nazorat (kompleans nazorati) tizimi faoliyati yo‘lga qo‘yildi.

Seminar mobaynida korrupsiyani yuzaga keltiruvchi holatlar, ularning oldini olish bo‘yicha olib borilayotgan chora-tadbirlar, korrupsiya holati natijasida yuzaga kelgan jinoyatlar oqibati, ushbu holatlar uchun belgilangan jazo va choralar to‘g‘risida ham atroflicha so‘z yuritildi.

Muloqot mobaynida jamiyatda korrupsiyaga qarshi murosasizlikni kuchaytirish, ushbu illatga qarshi kurashishda ijtimoiy faollikni oshirish yuzasidan fikr-mulohaza va takliflar bildirildi.

Korrupsiyaga qarshi kurashish agentligi

Axborot xizmati