Коррупцияга қарши курашиш агентлиги томонидан ўтказилган мониторинг натижасида 2023 йил 7 февраль куни Олот туман мактабгача таълим бўлими томонидан 33,1 млн сўмлик жиҳозлар харид қилиш учун энг яхши таклифларни ўтказиш юзасидан Давлат харидлари порталида қўйилган эълон ва танлаш ҳужжатларини ўрганиб чиқиш давомида бир қатор қонунбузилишларига йўл қўйилганлиги аниқланди.

Жумладан, танлаш жараёнида фақат битта ишлаб чиқарувчининг маҳсулотлари иштирок этиши ҳақида талаб қўйилиб, рақобат муҳити тўлақонли яратилмасдан, коррупциявий хавф-хатарлар юзага келган.

Ваҳоланки, Ўзбекистон Республикаси “Давлат харидлари тўғрисида”ги Қонуннинг 34-моддасига кўра, товарларнинг (ишларнинг, хизматларнинг) давлат хариди тавсифига аниқ товар белгисига ёки номига, патентга, конструкцияга ёки моделга, у мансуб бўлган муайян манбага ёки ишлаб чиқарувчига, эксклюзив ваколатли ҳуқуққа доир талаблар ёки ҳаволалар киритилмаслиги керак.

Юқоридаги ҳолатлар бўйича мазкур қонунбузилишини бартараф қилиш тўғрисида буюртмачига тақдимнома киритилди ва танлов эълони бекор қилинди.

Шунингдек, тўпланган ҳужжатлар тегишли ҳуқуқий чора кўриш учун Иқтисодиёт ва молия вазирлигига юборилди. Жиноят ишлари бўйича Олот туман судининг 2023 йил 2 март кунги қарори билан қонунбузилишига йўл қўйган мансабдор шахслар Маъмурий жавобгарлик тўғрисидаги кодекснинг 175-8-моддаси билан маъмурий жавобгарликка тортилди.

Коррупцияга қарши курашиш агентлиги

Ахборот хизмати