Korrupsiyaga qarshi kurashish agentligi tomonidan o‘tkazilgan monitoring natijasida 2023-yil 7-fevral kuni Olot tuman maktabgacha taʼlim bo‘limi tomonidan 33,1 mln so‘mlik jihozlar xarid qilish uchun eng yaxshi takliflarni o‘tkazish yuzasidan Davlat xaridlari portalida qo‘yilgan eʼlon va tanlash hujjatlarini o‘rganib chiqish davomida bir qator qonunbuzilishlariga yo‘l qo‘yilganligi aniqlandi.

Jumladan, tanlash jarayonida faqat bitta ishlab chiqaruvchining mahsulotlari ishtirok etishi haqida talab qo‘yilib, raqobat muhiti to‘laqonli yaratilmasdan, korrupsiyaviy xavf-xatarlar yuzaga kelgan.

Vaholanki, O‘zbekiston Respublikasi “Davlat xaridlari to‘g‘risida”gi Qonunning 34-moddasiga ko‘ra, tovarlarning (ishlarning, xizmatlarning) davlat xaridi tavsifiga aniq tovar belgisiga yoki nomiga, patentga, konstruksiyaga yoki modelga, u mansub bo‘lgan muayyan manbaga yoki ishlab chiqaruvchiga, eksklyuziv vakolatli huquqqa doir talablar yoki havolalar kiritilmasligi kerak.

Yuqoridagi holatlar bo‘yicha mazkur qonunbuzilishini bartaraf qilish to‘g‘risida buyurtmachiga taqdimnoma kiritildi va tanlov eʼloni bekor qilindi.

Shuningdek, to‘plangan hujjatlar tegishli huquqiy chora ko‘rish uchun Iqtisodiyot va moliya vazirligiga yuborildi. Jinoyat ishlari bo‘yicha Olot tuman sudining 2023-yil 2-mart kungi qarori bilan qonunbuzilishiga yo‘l qo‘ygan mansabdor shaxslar Maʼmuriy javobgarlik to‘g‘risidagi kodeksning 175-8-moddasi bilan maʼmuriy javobgarlikka tortildi.

Korrupsiyaga qarshi kurashish agentligi

Axborot xizmati