Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сонли Фармонига асосан Коррупцияга қарши курашиш агентлигига инвестиция лойиҳаларининг амалга оширилиши ва давлат дастурлари бажарилиши билан боғлиқ материалларни талаб қилиш, олиш ва ўрганиш ваколати берилган.

Шунингдек, Агентлик ташкил этилган даврдан бошлаб ўтган давр мобайнида Ўзбекистон Республикаси Президентининг бир қатор қарорлари билан Агентликка йирик ва муҳим инвестиция лойиҳалари бўйича ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан доимий назорат ўрнатиш бўйича топшириқлар берилган.

Хусусан, Ўзбекистон Республикаси Президентининг 2021 йил 18 сентябрдаги ПҚ-5246-сонли Қарорига асосан Ислом тараққиёт банки ва ОПЕК халқаро тараққиёт жамғармаси иштирокида “Қишлоқ жойларни барқарор ривожлантириш” лойиҳасини амалга ошириш белгиланган.

Қарорнинг 10-бандига асосан Агентликка лойиҳа бўйича ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан доимий назорат ўрнатиш вазифаси юклатилган.

Лойиҳанинг асосий техник-иқтисодий параметрларига биноан лойиҳанинг умумий қиймати 338 млн АҚШ долларини ташкил қилади, шундан:

- ИТБ маблағлари – 200 млн АҚШ доллари;

- ОПЕК маблағлари – 75 млн АҚШ доллари;

- Бирлашган Миллатлар Ташкилоти Тараққиёт Дастури (БМТТД) грант маблағлари – 3,05 млн АҚШ доллари;

- Ўзбекистон Республикаси улуши – 59,95 млн АҚШ доллари.

Лойиҳанинг амалга ошириш муддати – 5 йил.

Лойиҳага асосан Қорақалпоғистон Республикаси (46 та МФЙ), Хоразм
(49 та МФЙ), Бухоро (41 та МФЙ) ва Навоий (34 та МФЙ) вилоятларининг 20 та туманидаги 170 та МФЙ (40 та марказий, 130 та ёндош маҳалла)ларда ижтимоий ва инфратузилма объектларини қуриш, реконструкция қилиш ва таъмирлаш кўзда тутилган.

Иқтисодиёт ва молия вазирлиги ажратиладиган қарз маблағларининг мақсадли ва самарали сарфланиши ҳамда Лойиҳанинг ўз вақтида ва сифатли амалга оширилиши учун масъул ижро этувчи орган сифатида белгиланган.

Агентлик томонидан вазирликка Қарор доирасида маблағларнинг ажратилишида жараёнида очиқлик ва ошкораликни таъминлаш бўйича тавсиялар юборилган.

Ўзбекистон Республикаси Президентининг 2018 йил 16 июлдаги ПҚ-3857-сон Фармонига асосан халқаро молия институтлари ва хорижий ҳукумат молия ташкилотлари иштирокидаги лойиҳалар доирасида харид комиссияларига Агентлик вакили ҳам киритилиши белгиланган бўлиб, лойиҳа доирасида тендерлар ўтказилишида Агентлик вакили иштирок этиб келмоқда.

Иқтисодиёт ва молия вазирлигининг маълумотига асосан лойиҳа доирасида қуйидаги ишлар амалга оширилган:

– Ислом тараққиёт банки ҳамда ОПЕК билан 275 млн АҚШ долларилик қарз шартномалари имзоланган;

– БМТ ТД билан ҳамкорликда лойиҳа доирасида тажриба тариқасида 113 та МФЙда жамоа сафарбарлиги ишлари олиб борилиб, уларнинг манзилли рўйхати шакллантирилган ҳамда 553 та сублойиҳа танлаб олинган;

– Лойиҳа доирасида жами 64 та МФЙнинг (Хоразм - 12 та, Бухоро – 19 та, Навоий - 16 та ва Қоракалпоғистон Республикаси - 17 та) бош режалари ишлаб чиқилиб, тасдиқланган;

– Лойиҳани амалга ошириш гуруҳи керакли мутахассислар билан тўлиқ шакллантирилган;

– Қурилиш-пудрат ташкилотларини аниқлаш бўйича тендер ҳужжатлари ишлаб чиқилди ва Ислом тараққиёт банкига жорий йилнинг 6 февраль куни келишиш учун юборилган.

Ўтказилган тендер жараёнлари лойиҳалар веб-сайти www.uzrd.uz, e-xarid.uz ва Қурилиш вазирлиги қошида нашр этиладиган газеталарда эълонлар ёритиб борилмоқда.

Лойиҳанинг расмий веб-сайти (ridp.uz), ҳамда “телеграм” ва “Facebook” ижтимоий саҳифалари ташкил этилган. Расмий веб-сайтда лойиҳага оид умумий маълумотлар, қабул қилинган норматив-ҳуқуқий ҳужжатлар, лойиҳанинг умумий қиймати, қамрови, сублойиҳалар, лойиҳани амалга ошириш бўйича режа-график, янгиликлар ҳамда лойиҳани амалга ошириш гуруҳининг алоқа маълумотлари ҳақида маълумотлар бериб  ўтилган.

Хусусан, лойиҳанинг бош саҳифасида лойиҳа доирасида қурилиши ёки реконструкция қилиниши лозим бўлган объектлар ҳақида интерактив харита шаклида маълумотлар берилган.

Шунингдек, Лойиҳалар доирасида шикоятларни кўриб чиқиш, шунингдек, жамоатчилик вакилларининг лойиҳага тааллуқли саволларига жавоб бериб бориш мақсадида лойиҳанинг "Ишонч телефони" ва алоқа каналлари йўлга қўйилган.

Коррупцияга қарши курашиш агентлиги
Ахборот хизмати