O‘zbekiston Respublikasi Prezidentining 2020-yil 29-iyundagi “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi PF-6013-sonli Farmoniga asosan Korrupsiyaga qarshi kurashish agentligiga investitsiya loyihalarining amalga oshirilishi va davlat dasturlari bajarilishi bilan bog‘liq materiallarni talab qilish, olish va o‘rganish vakolati berilgan.

Shuningdek, Agentlik tashkil etilgan davrdan boshlab o‘tgan davr mobaynida O‘zbekiston Respublikasi Prezidentining bir qator qarorlari bilan Agentlikka yirik va muhim investitsiya loyihalari bo‘yicha ajratilgan mablag‘larning maqsadli ishlatilishi jarayonida ochiqlik va oshkoralikni ta’minlash ustidan doimiy nazorat o‘rnatish bo‘yicha topshiriqlar berilgan.

Xususan, O‘zbekiston Respublikasi Prezidentining 2021-yil 18-sentabrdagi PQ-5246-sonli Qaroriga asosan Islom taraqqiyot banki va OPEK xalqaro taraqqiyot jamg‘armasi ishtirokida “Qishloq joylarni barqaror rivojlantirish” loyihasini amalga oshirish belgilangan.

Qarorning 10-bandiga asosan Agentlikka loyiha bo‘yicha ajratilgan mablag‘larning maqsadli ishlatilishi jarayonida ochiqlik va oshkoralikni ta’minlash ustidan doimiy nazorat o‘rnatish vazifasi yuklatilgan.

Loyihaning asosiy texnik-iqtisodiy parametrlariga binoan loyihaning umumiy qiymati 338 mln AQSh dollarini tashkil qiladi, shundan:

- ITB mablag‘lari – 200 mln AQSh dollari;

- OPEK mablag‘lari – 75 mln AQSh dollari;

- Birlashgan Millatlar Tashkiloti Taraqqiyot Dasturi (BMTTD) grant mablag‘lari – 3,05 mln AQSh dollari;

- O‘zbekiston Respublikasi ulushi – 59,95 mln AQSh dollari.

Loyihaning amalga oshirish muddati – 5 yil.

Loyihaga asosan Qoraqalpog‘iston Respublikasi (46 ta MFY), Xorazm
(49 ta MFY), Buxoro (41 ta MFY) va Navoiy (34 ta MFY) viloyatlarining 20 ta tumanidagi 170 ta MFY (40 ta markaziy, 130 ta yondosh mahalla)larda ijtimoiy va infratuzilma obyektlarini qurish, rekonstruksiya qilish va ta’mirlash ko‘zda tutilgan.

Iqtisodiyot va moliya vazirligi ajratiladigan qarz mablag‘larining maqsadli va samarali sarflanishi hamda Loyihaning o‘z vaqtida va sifatli amalga oshirilishi uchun mas’ul ijro etuvchi organ sifatida belgilangan.

Agentlik tomonidan vazirlikka Qaror doirasida mablag‘larning ajratilishida jarayonida ochiqlik va oshkoralikni ta’minlash bo‘yicha tavsiyalar yuborilgan.

O‘zbekiston Respublikasi Prezidentining 2018-yil 16-iyuldagi PQ-3857-son Farmoniga asosan xalqaro moliya institutlari va xorijiy hukumat moliya tashkilotlari ishtirokidagi loyihalar doirasida xarid komissiyalariga Agentlik vakili ham kiritilishi belgilangan bo‘lib, loyiha doirasida tenderlar o‘tkazilishida Agentlik vakili ishtirok etib kelmoqda.

Iqtisodiyot va moliya vazirligining ma’lumotiga asosan loyiha doirasida quyidagi ishlar amalga oshirilgan:

– Islom taraqqiyot banki hamda OPEK bilan 275 mln AQSh dollarilik qarz shartnomalari imzolangan;

– BMT TD bilan hamkorlikda loyiha doirasida tajriba tariqasida 113 ta MFYda jamoa safarbarligi ishlari olib borilib, ularning manzilli ro‘yxati shakllantirilgan hamda 553 ta subloyiha tanlab olingan;

– Loyiha doirasida jami 64 ta MFYning (Xorazm - 12 ta, Buxoro – 19 ta, Navoiy - 16 ta va Qorakalpog‘iston Respublikasi - 17 ta) bosh rejalari ishlab chiqilib, tasdiqlangan;

– Loyihani amalga oshirish guruhi kerakli mutaxassislar bilan to‘liq shakllantirilgan;

– Qurilish-pudrat tashkilotlarini aniqlash bo‘yicha tender hujjatlari ishlab chiqildi va Islom taraqqiyot bankiga joriy yilning 6-fevral kuni kelishish uchun yuborilgan.

O‘tkazilgan tender jarayonlari loyihalar veb-sayti www.uzrd.uz, e-xarid.uz
va Qurilish vazirligi qoshida nashr etiladigan gazetalarda e’lonlar yoritib borilmoqda.

Loyihaning rasmiy veb-sayti (ridp.uz), hamda “telegram” va “facebook” ijtimoiy sahifalari tashkil etilgan. Rasmiy veb-saytda loyihaga oid umumiy ma’lumotlar, qabul qilingan normativ-huquqiy hujjatlar, loyihaning umumiy qiymati, qamrovi, subloyihalar, loyihani amalga oshirish bo‘yicha reja-grafik, yangiliklar hamda loyihani amalga oshirish guruhining aloqa ma’lumotlari haqida ma’lumotlar berib  o‘tilgan.

Xususan, loyihaning bosh sahifasida loyiha doirasida qurilishi yoki rekonstruksiya qilinishi lozim bo‘lgan obyektlar haqida interaktiv xarita shaklida ma’lumotlar berilgan.

Shuningdek, Loyihalar doirasida shikoyatlarni ko‘rib chiqish, shuningdek, jamoatchilik vakillarining loyihaga taalluqli savollariga javob berib borish maqsadida loyihaning "Ishonch telefoni" va aloqa kanallari yo‘lga qo‘yilgan.

 Korrupsiyaga qarshi kurashish agentligi
Axborot xizmati