Коррупцияга қарши курашиш агентлиги ташкил этилган даврдан бошлаб, ўтган давр мобайнида Ўзбекистон Республикаси Президентининг бир қатор қарорлари билан Агентликка йирик ва муҳим инвестиция лойиҳалари бўйича ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан доимий назорат ўрнатиш бўйича топшириқлар берилган.

Хусусан, Ўзбекистон Республикаси Президентининг 2022 йил 18 мартдагиПҚ-171-сонли Қарорига асосан “Франция тараққиёт агентлиги иштирокида “Навоий вилояти Кармана туманида оқова сув тизимларини қуриш” ҳамда “Қашқадарё вилояти Шаҳрисабз шаҳри ва Китоб тумани марказида оқова сув тизимларини реконструкция қилиш ва қуриш” лойиҳаларини амалга ошириш белгиланган.

Қарорнинг 12-бандига асосан Коррупцияга қарши курашиш агентлигига лойиҳа бўйича ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан доимий назорат ўрнатиш вазифаси юклатилган.

Лойиҳанинг умумий қиймати 91,0 миллион евро бўлиб, Франция тараққиёт агентлиги кредити – 80,3 миллион еврони, Ўзбекистон Республикасининг ҳиссаси – 10,7 миллион еврони ташкил этган. Лойиҳанинг амалга ошириш муддати – 6 йил.

Маблағлар сув таъминоти тизимларини модернизация қилиш бўйича қурилиш-монтаж ишларини олиб бориш ва машина ва ускуналар харид қилишга сарфланиши белгиланган.

«Ўзсувтаъминот» АЖ ажратиладиган қарз маблағларининг мақсадли ва самарали сарфланиши ҳамда Лойиҳанинг ўз вақтида ва сифатли амалга оширилиши учун масъул ижро этувчи орган сифатида белгиланган.

Агентлик томонидан «Ўзсувтаъминот» АЖга Қарор доирасида маблағларнинг ажратилишида жараёнида очиқлик ва ошкораликни таъминлаш бўйича тавсиялар юборилган.

Ўзбекистон Республикаси Президентининг 2018 йил 16 июлдаги ПҚ-3857-сон Фармонига асосан халқаро молия институтлари ва хорижий ҳукумат молия ташкилотлари иштирокидаги лойиҳалар доирасида харид комиссияларига Агентлик вакили ҳам киритилиши белгиланган бўлиб, лойиҳа доирасида ўтказилаётган тендерлар ўтказилишида Агентлик вакили иштирок этиб келмоқда.

«Ўзсувтаъминот» АЖ маълумотига асосан, бугунги кунда лойиҳа доирасида батафсил лойиҳалаш ва тендер ҳужжатларини ишлаб чиқиш учун консультант компанияларни аниқлаш бўйича ишлар олиб борилмоқда. Консультант компаниялар аниқлангандан сўнг консультант компаниялар томонидан тендер ҳужжатлари ишлаб чиқилиши ҳамда тендер савдолари асосида пудратчи ташкилотлар билан шартномалар имзоланиши режалаштирилган.

Лойиҳани бошқаришда консалтинг компанияни танлаш учун таклифларни қабул қилиш бўйича бир қатор халқаро нашрларда (tenderweek.com, afd.market.com) ва uzsuv.uz интернет саҳифаларида эълонлар берилган.

«Ўзсувтаъминот» АЖнинг расмий веб саҳифасида (https://uzsuv.uz/uz/ongoing-projects) лойиҳа бўйича батафсил маълумотлар, жумладан лойиҳани амалга ошириш учун асос бўлиб хизмат қилувчи ҳужжатлар, амалга ошириладиган қурилиш ишлари ва лойиҳанинг молиялаштириш манбалари, жорий ҳолати ҳамда амалга оширилган ишлар ва бошқа маълумотлар акс эттирилган ва маълумотлар доимий равишда янгиланиб борилмоқда.

Шунингдек, Лойиҳа ҳақида батафсил маълумотлар ҳамда тендерларда иштирок этиш бўйича эълон Франция тараққиёт агентлигининг расмий саҳифасида (afd.fr) инглиз тилида чоп этилган.

Коррупцияга қарши курашиш агентлиги

Ахборот хизмати