Korrupsiyaga qarshi kurashish agentligi tashkil etilgan davrdan boshlab, o‘tgan davr mobaynida O‘zbekiston Respublikasi Prezidentining bir qator qarorlari bilan Agentlikka yirik va muhim investitsiya loyihalari bo‘yicha ajratilgan mablag‘larning maqsadli ishlatilishi jarayonida ochiqlik va oshkoralikni taʼminlash ustidan doimiy nazorat o‘rnatish bo‘yicha topshiriqlar berilgan.

Xususan, O‘zbekiston Respublikasi Prezidentining 2022-yil 18-martdagi PQ-171-sonli Qaroriga asosan “Fransiya taraqqiyot agentligi ishtirokida “Navoiy viloyati Karmana tumanida oqova suv tizimlarini qurish” hamda “Qashqadaryo viloyati Shahrisabz shahri va Kitob tumani markazida oqova suv tizimlarini rekonstruksiya qilish va qurish” loyihalarini amalga oshirish belgilangan.

Qarorning 12-bandiga asosan Korrupsiyaga qarshi kurashishagentligiga loyiha bo‘yicha ajratilgan mablag‘larning maqsadli ishlatilishi jarayonida ochiqlik va oshkoralikni taʼminlash ustidan doimiy nazorat o‘rnatish vazifasi yuklatilgan.

Loyihaning umumiy qiymati 91,0 million yevro bo‘lib, Fransiya taraqqiyot agentligi krediti – 80,3 million yevroni, O‘zbekiston Respublikasining hissasi – 10,7 million yevroni tashkil etgan. Loyihaning amalga oshirish muddati – 6 yil.

Mablag‘lar suv taʼminoti tizimlarini modernizatsiya qilish bo‘yicha qurilish-montaj ishlarini olib borish va mashina va uskunalar xarid qilishga sarflanishi belgilangan.

«O‘zsuvtaʼminot» AJ ajratiladigan qarz mablag‘larining maqsadli va samarali sarflanishi hamda Loyihaning o‘z vaqtida va sifatli amalga oshirilishi uchun masʼul ijro etuvchi organ sifatida belgilangan.

Agentlik tomonidan «O‘zsuvtaʼminot» AJga Qaror doirasida mablag‘larning ajratilishida jarayonida ochiqlik va oshkoralikni taʼminlash bo‘yicha tavsiyalar yuborilgan.

O‘zbekiston Respublikasi Prezidentining 2018-yil 16-iyuldagi PQ-3857-son Farmoniga asosan xalqaro moliya institutlari va xorijiy hukumat moliya tashkilotlari ishtirokidagi loyihalar doirasida xarid komissiyalariga Agentlik vakili ham kiritilishi belgilangan bo‘lib, loyiha doirasida o‘tkazilayotgan tenderlar o‘tkazilishida Agentlik vakili ishtirok etib kelmoqda.

«O‘zsuvtaʼminot» AJ maʼlumotiga asosan, bugungi kunda loyiha doirasida batafsil loyihalash va tender hujjatlarini ishlab chiqish uchun konsultant kompaniyalarni aniqlash bo‘yicha ishlar olib borilmoqda. Konsultant kompaniyalar aniqlangandan so‘ng konsultant kompaniyalar tomonidan tender hujjatlari ishlab chiqilishi hamda tender savdolari asosida pudratchi tashkilotlar bilan shartnomalar imzolanishi rejalashtirilgan.

Loyihani boshqarishda konsalting kompaniyani tanlash uchun takliflarni qabul qilish bo‘yicha bir qator xalqaro nashrlarda (tenderweek.com, afd.market.com) va uzsuv.uz internet sahifalarida eʼlonlar berilgan.

«O‘zsuvtaʼminot» AJning rasmiy veb sahifasida (https://uzsuv.uz/uz/ongoing-projects) loyiha bo‘yicha batafsil maʼlumotlar, jumladan loyihani amalga oshirish uchun asos bo‘lib xizmat qiluvchi hujjatlar, amalga oshiriladigan qurilish ishlari va loyihaning moliyalashtirish manbalari, joriy holati hamda amalga oshirilgan ishlar va boshqa maʼlumotlar aks ettirilgan va maʼlumotlar doimiy ravishda yangilanib borilmoqda.

Shuningdek, Loyiha haqida batafsil maʼlumotlar hamda tenderlarda ishtirok etish bo‘yicha eʼlon Fransiya taraqqiyot agentligining rasmiy sahifasida (afd.fr) ingliz tilida chop etilgan.

Korrupsiyaga qarshi kurashish agentligi

Axborot xizmati