Жорий йилнинг 27 март куни Коррупцияга қарши курашиш агентлиги раҳбарияти, Латвия Республикаси делегацияси, ушбу мамлакатнинг Тошкентдаги элчихонаси ҳамда Халқаро ҳамкорлик бўйича Германия жамияти ваколатхонаси (GIZ) вакиллари билан учрашув бўлиб ўтди.

Учрашувда ўзаро ҳамкорлик алоқаларини ривожлантириш, хусусан, Ўзбекистонда маъмурий ислоҳотларни ва коррупцияга қарши курашни қўллаб-қувватлашга қаратилган янги—“Ўзбекистонда самарали бошқарув” лойиҳаси доирасидаги аниқ ҳамкорлик йўналишларини белгилаб олиш ва амалга ошириш масалалари атрофлича муҳокама қилинди.

Маълумот учун: “Ўзбекистонда самарали бошқарув” лойиҳаси Латвия Республикаси томонидан Европа Иттифоқи делегациясининг Тошкентдаги ваколатхонаси ва Халқаро ҳамкорлик бўйича Германия жамияти ваколатхонаси билан биргаликда ишлаб чиқилган.

Жумладан, коррупцияга қарши курашиш соҳасидаги норматив-ҳуқуқий базани таҳлил қилиш ва баҳолаш, халқаро ҳужжатлар нормаларининг миллий қонунчиликка татбиқ этилишини ўрганиш, аҳолининг коррупцияни қабул қилиш даражасини аниқлаш бўйича ижтимоий тадқиқот ўтказиш каби бир қатор масалаларда ўзаро фикр алмашилди.

Шунингдек, Латвия масъул ташкилот ва идоралари билан қўшма тадбирлар, семинар-тренинглар ташкил этиш, махсус ўқув дастурлар, жумладан, Агентлик ходимлари учун малака ошириш дастурларини ишлаб чиқиш масалалари ҳам кўриб чиқилди.

Учрашув якунида муҳокама қилинган ҳамкорлик йўналишларида ишларни жадаллаштириш ва Агентлик томонидан тақдим этилган ўзаро манфаатли таклифларни истиқболда амалга ошириш юзасидан келишувга эришилди.

Коррупцияга қарши курашиш агентлиги

Ахборот хизмати