Joriy yilning 27-mart kuni Korrupsiyaga qarshi kurashish agentligi rahbariyati, Latviya Respublikasi delegatsiyasi, ushbu mamlakatning Toshkentdagi elchixonasi hamda Xalqaro hamkorlik bo‘yicha Germaniya jamiyati vakolatxonasi (GIZ) vakillari bilan uchrashuv bo‘lib o‘tdi.

Uchrashuvda o‘zaro hamkorlik aloqalarini rivojlantirish, xususan, O‘zbekistonda maʼmuriy islohotlarni va korrupsiyaga qarshi kurashni qo‘llab-quvvatlashga qaratilgan yangi—“O‘zbekistonda samarali boshqaruv” loyihasi doirasidagi aniq hamkorlik yo‘nalishlarini belgilab olish va amalga oshirish masalalari atroflicha muhokama qilindi.

Maʼlumot uchun: “O‘zbekistonda samarali boshqaruv” loyihasi Latviya Respublikasi tomonidan Yevropa Ittifoqi delegatsiyasining Toshkentdagi vakolatxonasi va Xalqaro hamkorlik bo‘yicha Germaniya jamiyati vakolatxonasi bilan birgalikda ishlab chiqilgan.

Jumladan, korrupsiyaga qarshi kurashish sohasidagi normativ-huquqiy bazani tahlil qilish va baholash, xalqaro hujjatlar normalarining milliy qonunchilikka tatbiq etilishini o‘rganish, aholining korrupsiyani qabul qilish darajasini aniqlash bo‘yicha ijtimoiy tadqiqot o‘tkazish kabi bir qator masalalarda o‘zaro fikr almashildi.

Shuningdek, Latviya masʼul tashkilot va idoralari bilan qo‘shma tadbirlar, seminar-treninglar tashkil etish, maxsus o‘quv dasturlar, jumladan, Agentlik xodimlari uchun malaka oshirish dasturlarini ishlab chiqish masalalari ham ko‘rib chiqildi.

Uchrashuv yakunida muhokama qilingan hamkorlik yo‘nalishlarida ishlarni jadallashtirish va Agentlik tomonidan taqdim etilgan o‘zaro manfaatli takliflarni istiqbolda amalga oshirish yuzasidan kelishuvga erishildi.

Korrupsiyaga qarshi kurashish agentligi

Axborot xizmati