Жорий йилнинг 28 март куни Коррупцияга қарши курашиш агентлиги ҳамда Тожикистон Республикаси Давлат молиявий назорати ва коррупцияга қарши курашиш агентлиги ва Давлат хизматлари агентлиги вакиллари ўртасида “Вазирликлар ва давлат органларида давлат хизматида ҳалолликни таъминлаш ҳамда коррупцияга қарши курашда ички назорат тузилмалари фаолиятини самарали ташкил этиш” масалаларига бағишланган онлайн учрашув бўлиб ўтди.

Маълумот учун: 2022 йил 21 апрелда Коррупцияга қарши курашиш агентлиги билан Тожикистон Республикаси Давлат молиявий назорати ва коррупцияга қарши курашиш агентлиги ўртасида ўзаро англашув Меморандумини амалга ошириш юзасидан чора-тадбирлар режаси имзоланган. Мазкур Чора-тадбирларлар режасида давлат хизматчиларини коррупцияга қарши ўқитишнинг замонавий усуллари, давлат хизматида ҳалолликни таъминлаш ҳамда комплаенс-назорат тузилмалари фаолиятини самарали ташкил этиш каби масалаларда ўзаро тажриба алмашиш кўзда тутилган.

Учрашувда Агентлик масъул ходимлари коррупцияга қарши ички назорат тузилмалари фаолияти, коррупциявий хавф-хатарларни баҳолаш бўйича “Eanticor.uz” платформаси, коррупцияга қарши курашиш самарадорлигини рейтинг баҳолаш ишлари тўғрисида батафсил маълумот бериб ўтди. 

Хусусан,  Агентлик томонидан яқинда эълон қилинган коррупцияга қарши курашиш бўйича чора-тадбирларнинг самарадорлиги рейтингида юқори натижаларни қайд этган вазирлик ва идоралар – Иқтисодиёт ва молия вазирлиги ҳузуридаги Солиқ қўмитаси, “Ўзбекистон миллий электр тармоқлари” АЖ, “Ипотека” банк АТИБнинг коррупцияга қарши ички (комплаенс) назорат тузилмалари раҳбарлари  ўз фаолияти мисолида ушбу тузилманинг аҳамияти ва самараси ҳақида сўзлаб берди. 

Ўз ўрнида, Давлат молиявий назорати ва коррупцияга қарши курашиш агентлиги вакиллари ўз фаолият йўналишлари, шунингдек, Тожикистонда коррупциянинг олдини олиш ва унга қарши курашиш соҳасидаги қонунчиликни такомиллаштириш, халқаро стандартлар ва илғор хорижий амалиётни жорий этиш жараёнлари билан яқиндан таништирди. 

Шундан сўнг давлат хизматида ҳалолликни таъминлаш, комплаенс-назорат тузилмаси фаолиятини самарали ташкил этиш ва бошқа шу каби йўналишлар бўйича ўзаро тажриба алмашиш ҳамда амалий ҳамкорлик чораларини кенгайтириш масалалари муҳокама қилинди. 

Якунда яқин истиқболда биргаликда амалга ошириладиган режалар, мақсад-вазифалар белгилаб олинди.

Коррупцияга қарши курашиш агентлиги
Ахборот хизмати