Joriy yilning 28-mart kuni Korrupsiyaga qarshi kurashish agentligi hamda Tojikiston Respublikasi Davlat moliyaviy nazorati va korrupsiyaga qarshi kurashish agentligi va Davlat xizmatlari agentligi vakillari o‘rtasida “Vazirliklar va davlat organlarida davlat xizmatida halollikni taʼminlash hamda korrupsiyaga qarshi kurashda ichki nazorat tuzilmalari faoliyatini samarali tashkil etish” masalalariga bag‘ishlangan onlayn uchrashuv bo‘lib o‘tdi.

Maʼlumot uchun: 2022-yil 21-aprelda Korrupsiyaga qarshi kurashish agentligi bilan Tojikiston Respublikasi Davlat moliyaviy nazorati va korrupsiyaga qarshi kurashish agentligi o‘rtasida o‘zaro anglashuv Memorandumini amalga oshirish yuzasidan chora-tadbirlar rejasi imzolangan. Mazkur Chora-tadbirlarlar rejasida davlat xizmatchilarini korrupsiyaga qarshi o‘qitishning zamonaviy usullari, davlat xizmatida halollikni taʼminlash hamda komplayens-nazorat tuzilmalari faoliyatini samarali tashkil etish kabi masalalarda o‘zaro tajriba almashish ko‘zda tutilgan.

Uchrashuvda Agentlik masʼul xodimlari korrupsiyaga qarshi ichki nazorat tuzilmalari faoliyati, korrupsiyaviy xavf-xatarlarni baholash bo‘yicha “Eanticor.uz” platformasi, korrupsiyaga qarshi kurashish samaradorligini reyting baholash ishlari to‘g‘risida batafsil maʼlumot berib o‘tdi.

Xususan, Agentlik tomonidan yaqinda eʼlon qilingan korrupsiyaga qarshi kurashish bo‘yicha chora-tadbirlarning samaradorligi reytingida yuqori natijalarni qayd etgan vazirlik va idoralar – Iqtisodiyot va moliya vazirligi huzuridagi Soliq qo‘mitasi, “O‘zbekiston milliy elektr tarmoqlari” AJ, “Ipoteka” bank ATIBning korrupsiyaga qarshi ichki (komplayens) nazorat tuzilmalari rahbarlari o‘z faoliyati misolida ushbu tuzilmaning ahamiyati va samarasi haqida so‘zlab berdi.

O‘z o‘rnida, Davlat moliyaviy nazorati va korrupsiyaga qarshi kurashish agentligi vakillari o‘z faoliyat yo‘nalishlari, shuningdek, Tojikistonda korrupsiyaning oldini olish va unga qarshi kurashish sohasidagi qonunchilikni takomillashtirish, xalqaro standartlar va ilg‘or xorijiy amaliyotni joriy etish jarayonlari bilan yaqindan tanishtirdi.

Shundan so‘ng davlat xizmatida halollikni taʼminlash, komplayens-nazorat tuzilmasi faoliyatini samarali tashkil etish va boshqa shu kabi yo‘nalishlar bo‘yicha o‘zaro tajriba almashish hamda amaliy hamkorlik choralarini kengaytirish masalalari muhokama qilindi.

Yakunda yaqin istiqbolda birgalikda amalga oshiriladigan rejalar, maqsad-vazifalar belgilab olindi.

Korrupsiyaga qarshi kurashish agentligi
Axborot xizmati