Ўзбекистоннинг Латвиядаги дипломатик ваколатхонаси ҳамда Европада хавфсизлик ва ҳамкорлик ташкилоти (OSCE) кўмагида ташкил этилаётган мазкур ишчи ташриф давомида делегация вакиллари Эстониянинг Адлия вазирлиги, Ички ишлар вазирлиги, Электрон ҳукумат академияси, Давлат харидлари ва давлат кўмаги бошқармаси, шунингдек, Финляндиянинг Ташқи ишлар вазирлиги, Адлия вазирлиги, Рақобат ва истеъмолчилар идораси, Молия вазирлиги ҳамда Хельсинки университети Қонун устуворлиги маркази раҳбарияти билан икки томонлама учрашувлар ўтказиши режалаштирилган.

Учрашувлар давомида мазкур давлатларда коррупцияга қарши курашиш сиёсатининг шаклланиши, давлат идораларининг соҳадаги фаолиятини мувофиқлаштириш ҳамда коррупциянинг олдини олиш, хусусан, давлат органларининг очиқлиги, шаффофлиги ва ҳисобдорлиги бўйича тажриба алмашилади ва ўзаро ҳамкорлик истиқболлари муҳокама қилинади.

Маълумот учун: бугунги кунда Эстония электрон ҳукуматни жорий этиш ва ривожлантириш бўйича Европа ҳамда дунёда етакчилардан бири ҳисобланади. Аҳолига кўрсатиладиган давлат хизматлари сони 600 дан ортиқни, тадбиркорларга кўрсатиладиган давлат хизматлари сони эса 2400 дан ортиқни ташкил этади.
Финляндия “Transparency International” халқаро ташкилотининг Коррупцияни қабул қилиш индексида 2-ўринни эгаллаб, дунёдаги энг коррупциясиз давлат сифатида эътироф этиб келинмоқда.

Ташриф тафсилотлари юзасидан қўшимча батафсил маълумот бериб борилади.