Korrupsiyaga qarshi kurashish agentligi direktori boshchiligidagi O‘zbekiston delegatsiyasi joriy yilning 17-20 aprel kunlari Estoniya va Finlyandiya davlatlarida bo‘ladi.

O‘zbekistonning Latviyadagi diplomatik vakolatxonasi hamda Yevropada xavfsizlik va hamkorlik tashkiloti (OSCE) ko‘magida tashkil etilayotgan mazkur ishchi tashrif davomida delegatsiya vakillari Estoniyaning Adliya vazirligi, Ichki ishlar vazirligi, Elektron hukumat akademiyasi, Davlat xaridlari va davlat ko‘magi boshqarmasi, shuningdek, Finlyandiyaning Tashqi ishlar vazirligi, Adliya vazirligi, Raqobat va iste’molchilar idorasi, Moliya vazirligi hamda Xelsinki universiteti Qonun ustuvorligi markazi rahbariyati bilan ikki tomonlama uchrashuvlar o‘tkazishi rejalashtirilgan.

Uchrashuvlar davomida mazkur davlatlarda korrupsiyaga qarshi kurashish siyosatining shakllanishi, davlat idoralarining sohadagi faoliyatini muvofiqlashtirish hamda korrupsiyaning oldini olish, xususan, davlat organlarining ochiqligi, shaffofligi va hisobdorligi bo‘yicha tajriba almashiladi va o‘zaro hamkorlik istiqbollari muhokama qilinadi.

Ma’lumot uchun: bugungi kunda Estoniya elektron hukumatni joriy etish va rivojlantirish bo‘yicha Yevropa hamda dunyoda yetakchilardan biri hisoblanadi. Aholiga ko‘rsatiladigan davlat xizmatlari soni 600 dan ortiqni, tadbirkorlarga ko‘rsatiladigan davlat xizmatlari soni esa 2400 dan ortiqni tashkil etadi.

Finlyandiya “Transparency International” xalqaro tashkilotining Korrupsiyani qabul qilish indeksida 2-o‘rinni egallab, dunyodagi eng korrupsiyasiz davlat sifatida e’tirof etib kelinmoqda.

Tashrif tafsilotlari yuzasidan qo‘shimcha batafsil ma’lumot berib boriladi.