Хабар қилганимиздек, Коррупцияга қарши курашиш агентлиги директори бошчилигидаги Ўзбекистон делегацияси 17-18 апрель кунлари ишчи ташриф билан Эстония давлатида бўлиб, қатор давлат идоралари ва тадқиқот муассасалари вакиллари билан учрашди.

Хусусан, Эстония Давлат харидлари ва давлат кўмаги департаментида ўтказилган учрашувда Департамент фаолиятидаги асосий вазифалар ва уларнинг самарали амалга оширилиши жараёнлари хусусида батафсил маълумот берилди.

Мулоқотда Эстония “Давлат харидлари реестри” онлайн платформасининг самарали ишлаш тартиби  ва назоратини олиб бориш масаласига алоҳида урғу берилиб, ушбу онлайн платформанинг ижобий жиҳатларини таҳлил қилиш, давлат харидлари соҳасида шаффофлик механизмларини Ўзбекистонда жорий этиш бўйича қўшма лойиҳаларни амалга оширишга келишиб олинди.

Делегация вакиллари Эстония Электрон ҳукумат академияси (eGA) вакиллари билан ҳам учрашиб, Академия етакчи экспертлари ёрдамида мамлакатда йўлга қўйилган электрон ҳукуматнинг самарали фаолияти билан яқиндан танишишди. 

Маълум қилинишича, Академияда ривожланаётган давлатлар соҳа мутахассисларининг малакасини ошириш курслари ҳам мавжуд бўлиб, ҳар йили уч ой муддатгача малака ошириш учун номзодларни қабул қилади.

Мулоқот мобайнида eGA  билан ҳамкорликда давлат хизматчилари учун коррупцияга қарши курашиш бўйича ўқув курсларини ишлаб чиқиш, рақамли технологияларни янада кенгроқ жорий этиш, маълумотлар базалари интеграцияси бўйича лойиҳаларни амалга ошириш имкониятлари муҳокама қилинди.

Ташрифнинг иккинчи куни делегация вакиллари Эстония Ички ишлар вазирлиги ва Адлия вазирлиги раҳбарияти билан учрашиб, мазкур идораларда коррупциявий жиноятлар статистикасининг юритилиши, уни келтириб чиқараётган сабаблар таҳлили ҳамда фаолият очиқлигини таъминлашга оид қатор йўналишлардаги фаолияти билан танишилди.

Хусусан, Ички ишлар вазирлигида бўлиб ўтган учрашувда коррупциявий жиноятларни фош этиш ва аниқлаш, бу борада жамоатчилик назорати, жумладан, оммавий ахборот воситаларининг муҳим иштироки  масалалари муҳокамалар марказида бўлди.

Делегация вакиллари бу борада Эстонияда қўлланиладиган электрон воситалар ва платформалар билан танишди.

Якунда ўзаро тажриба алмашиш, хусусан, ҳуқуқни муҳофаза қилувчи идоралар учун махсус тренинг тадбирларини амалга оширишга келишиб олинди.

Делегация вакилларининг Эстония Адлия вазирлигида бўлиб ўтган учрашувида эса  мамлакатда коррупцияга қарши курашиш сиёсатининг шаклланиши, бу борада давлат органлари фаолиятини мувофиқлаштириш ҳамда коррупциянинг олдини олишга қаратилган чоралар муҳокама қилинди.

Вазирликнинг давлат органлари ва ташкилотларининг очиқлигини таъминлаш, коррупцияга қарши курашиш жараёнларига ёшларни фаол жалб этиш ва бу борада амалга оширилаётган лойиҳалари тақдимот қилинди.

Делегация вакилларининг Эстонияга ташрифи коррупцияга қарши курашишда ўзаро тажриба алмашиш ва ҳамкорлик алоқаларини йўлга қўйиш, истиқболли лойиҳаларни амалга ошириш каби бир қатор муҳим келишувларга эришилгани билан самарали кечди. Учрашувлар якуни бўйича Эстония томони илгари сурилган ўзаро манфаатли таклифларни истиқболда амалга оширишга тайёр эканлигини маълум қилди.

Коррупцияга қарши курашиш агентлиги

Ахборот хизмати