Xabar qilganimizdek, Korrupsiyaga qarshi kurashish agentligi direktori boshchiligidagi O‘zbekiston delegatsiyasi 17-18-aprel kunlari ishchi tashrif bilan Estoniya davlatida bo‘lib, qator davlat idoralari va tadqiqot muassasalari vakillari bilan uchrashdi.

Xususan, Estoniya Davlat xaridlari va davlat ko‘magi departamentida o‘tkazilgan uchrashuvda Departament faoliyatidagi asosiy vazifalar va ularning samarali amalga oshirilishi jarayonlari xususida batafsil maʼlumot berildi.

Muloqotda Estoniya “Davlat xaridlari reyestri” onlayn platformasining samarali ishlash tartibi  va nazoratini olib borish masalasiga alohida urg‘u berilib, ushbu onlayn platformaning ijobiy jihatlarini tahlil qilish, davlat xaridlari sohasida shaffoflik mexanizmlarini O‘zbekistonda joriy etish bo‘yicha qo‘shma loyihalarni amalga oshirishga kelishib olindi.

Delegatsiya vakillari Estoniya Elektron hukumat akademiyasi (eGA) vakillari bilan ham uchrashib, Akademiya yetakchi ekspertlari yordamida mamlakatda yo‘lga qo‘yilgan elektron hukumatning samarali faoliyati bilan yaqindan tanishishdi. 

Maʼlum qilinishicha, Akademiyada rivojlanayotgan davlatlar soha mutaxassislarining malakasini oshirish kurslari ham mavjud bo‘lib, har yili uch oy muddatgacha malaka oshirish uchun nomzodlarni qabul qiladi.

Muloqot mobaynida eGA  bilan hamkorlikda davlat xizmatchilari uchun korrupsiyaga qarshi kurashish bo‘yicha o‘quv kurslarini ishlab chiqish, raqamli texnologiyalarni yanada kengroq joriy etish, maʼlumotlar bazalari integratsiyasi bo‘yicha loyihalarni amalga oshirish imkoniyatlari muhokama qilindi.

Tashrifning ikkinchi kuni delegatsiya vakillari Estoniya Ichki ishlar vazirligi va Adliya vazirligi rahbariyati bilan uchrashib, mazkur idoralarda korrupsiyaviy jinoyatlar statistikasining yuritilishi, uni keltirib chiqarayotgan sabablar tahlili hamda faoliyat ochiqligini taʼminlashga oid qator yo‘nalishlardagi faoliyati bilan tanishildi.

Xususan, Ichki ishlar vazirligida bo‘lib o‘tgan uchrashuvda korrupsiyaviy jinoyatlarni fosh etish va aniqlash, bu borada jamoatchilik nazorati, jumladan, ommaviy axborot vositalarining muhim ishtiroki  masalalari muhokamalar markazida bo‘ldi.

Delegatsiya vakillari bu borada Estoniyada qo‘llaniladigan elektron vositalar va platformalar bilan tanishdi.

Yakunda o‘zaro tajriba almashish, xususan, huquqni muhofaza qiluvchi idoralar uchun maxsus trening tadbirlarini amalga oshirishga kelishib olindi.

Delegatsiya vakillarining Estoniya Adliya vazirligida bo‘lib o‘tgan uchrashuvida esa  mamlakatda korrupsiyaga qarshi kurashish siyosatining shakllanishi, bu borada davlat organlari faoliyatini muvofiqlashtirish hamda korrupsiyaning oldini olishga qaratilgan choralar muhokama qilindi.

Vazirlikning davlat organlari va tashkilotlarining ochiqligini taʼminlash, korrupsiyaga qarshi kurashish jarayonlariga yoshlarni faol jalb etish va bu borada amalga oshirilayotgan loyihalari taqdimot qilindi.

Delegatsiya vakillarining Estoniyaga tashrifi korrupsiyaga qarshi kurashishda o‘zaro tajriba almashish va hamkorlik aloqalarini yo‘lga qo‘yish, istiqbolli loyihalarni amalga oshirish kabi bir qator muhim kelishuvlarga erishilgani bilan samarali kechdi. Uchrashuvlar yakuni bo‘yicha Estoniya tomoni ilgari surilgan o‘zaro manfaatli takliflarni istiqbolda amalga oshirishga tayyor ekanligini maʼlum qildi.

Korrupsiyaga qarshi kurashish agentligi
 Axborot xizmati