Коррупцияга қарши курашиш агентлиги директори бошчилигидаги Ўзбекистон делегациясининг Европага ишчи ташрифи 19-20 апрель кунлари Финляндияда давом этди.

Ташрифнинг илк куни Финляндия Ташқи ишлар вазирлигининг Россия, Шарқий Европа ва Марказий Осиё бошқармаси бош директори Мария Лиивала билан учрашув бўлиб ўтди.

Музокаралар давомида Ўзбекистонда коррупциянинг олдини олиш ва унга қарши курашиш соҳасидаги ислоҳотларнинг бориши, эришилган натижалар ҳамда долзарб вазифалар ҳақида сўз юритилди. Шунингдек, икки мамлакат масъул идоралари ўртасида мазкур соҳада яқин ҳамкорликни йўлга қўйиш, шу жумладан, қўшма лойиҳаларни амалга ошириш имкониятлари атрофлича муҳокама қилинди.

Хусусан, Финляндиянинг “Коррупцияга карши кураш миллий ҳамкорлик тармоғи” (Anticorruption Network) ижобий тажрибасини юртимизда жорий этиш, Коррупцияга қарши курашиш Миллий кенгаши билан яқин алоқаларни ўрнатиш муҳимлиги таъкидланди.

Шунингдек, Ўзбекистон делегацияси томонидан давлат органлари фаолияти очиқлигини таъминлаш, коррупцияга қарши ички назорат тузилмалари фаолиятини такомиллаштириш йўналишларида методик ва техник кўмак кўрсатиш юзасидан таклифлар илгари сурилди. 

Музокаралар якунида, томонлар “Қонун устуворлиги” лойиҳаси доирасида коррупциянинг олдини олиш ва унга қарши курашиш бўйича қўшма лойиҳаларни ишлаб чиқиш ҳамда масъул идоралар билан уларни амалга оширишга қаратилган чора-тадбирларни белгилаб олишга келишилди. 

Коррупцияга қарши курашиш агентлиги

Ахборот хизмати