Korrupsiyaga qarshi kurashish agentligi direktori boshchiligidagi O‘zbekiston delegatsiyasining Yevropaga ishchi tashrifi 19-20 aprel kunlari Finlyandiyada davom etdi.

Tashrifning ilk kuni Finlyandiya Tashqi ishlar vazirligining Rossiya, Sharqiy Yevropa va Markaziy Osiyo boshqarmasi bosh direktori Mariya Liivala bilan uchrashuv bo‘lib o‘tdi.

Muzokaralar davomida O‘zbekistonda korrupsiyaning oldini olish va unga qarshi kurashish sohasidagi islohotlarning borishi, erishilgan natijalar hamda dolzarb vazifalar haqida so‘z yuritildi. Shuningdek, ikki mamlakat mas’ul idoralari o‘rtasida mazkur sohada yaqin hamkorlikni yo‘lga qo‘yish, shu jumladan, qo‘shma loyihalarni amalga oshirish imkoniyatlari atroflicha muhokama qilindi.

Xususan, Finlyandiyaning “Korrupsiyaga karshi kurash milliy hamkorlik tarmog‘i” (Anticorruption Network) ijobiy tajribasini yurtimizda joriy etish, Korrupsiyaga qarshi kurashish Milliy kengashi bilan yaqin aloqalarni o‘rnatish muhimligi ta’kidlandi.

Shuningdek, O‘zbekiston delegatsiyasi tomonidan davlat organlari faoliyati ochiqligini ta’minlash, korrupsiyaga qarshi ichki nazorat tuzilmalari faoliyatini takomillashtirish yo‘nalishlarida metodik va texnik ko‘mak ko‘rsatish yuzasidan takliflar ilgari surildi.

Muzokaralar yakunida tomonlar “Qonun ustuvorligi” loyihasi doirasida korrupsiyaning oldini olish va unga qarshi kurashish bo‘yicha qo‘shma loyihalarni ishlab chiqish hamda mas’ul idoralar bilan ularni amalga oshirishga qaratilgan chora-tadbirlarni belgilab olishga kelishildi.

Korrupsiyaga qarshi kurashish agentligi

Axborot xizmati