Жорий йилнинг 20 апрель куни Коррупцияга қарши курашиш агентлиги ҳузуридаги Жамоатчилик кенгашининг навбатдаги йиғилиши бўлиб ўтди.

Унда Коррупцияга қарши курашиш агентлиги томонидан Коррупцияга қарши курашиш ишларининг самарадорлигини рейтинг баҳолаш ҳамда Давлат органлари ва ташкилотларида очиқлик бўйича амалга оширилган ишларнинг самарадорлигини баҳолашга қаратилган Очиқлик индекси натижаларинининг тақдимоти амалга оширилди  

Ушбу тадбирда рейтинг натижалари таҳлили ва паст кўрсаткичли муассаса ва ташкилотлар билан олиб борилаётган ишлар муҳокама этилди.

Дастлаб, давлат органлари ва ташкилотлари, шу жумладан, маҳаллий ижро этувчи ҳокимият органларида коррупцияга қарши курашиш бўйича чора-тадбирларнинг самарадорлиги рейтинг баҳолаш натижалари тўғрисида Агентлик масъул ходими тақдимотни амалга оширди.

Таъкидланганидек, мазкур рейтингда давлат ташкилотларида коррупцияга қарши курашиш бўйича механизмларнинг амалиётга татбиқ этилганлиги, коррупциявий хавф-хатарларни камайтирилганлиги, давлат ташкилотлари раҳбарларининг коррупцияга қарши муросасиз муносабатни кўрсатувчи ҳаракатларининг мавжудлиги, ходимларнинг коррупцияга қарши курашишга оид ички тартиблардан хабардорлиги, аҳолини ушбу иллатга нисбатан муросасиз муносабатни шакллантиришга қаратилган тарғибот тадбирларининг самарадорлиги баҳоланади.

Ўтказилган рейтинг баҳолаш натижалари асосида давлат ташкилотлари томонидан коррупцияга қарши курашиш соҳасида белгиланган вазифаларнинг қай даражада самарали амалга оширилаётганини мониторинг қилиш билан бир қаторда аниқланган камчиликларни бартараф этиш, соҳада соғлом рақобат муҳитини кучайтириш, ташкилот раҳбарларининг масъулиятини оширишга хизмат қилади.

Савол ва мулоҳазалар қиссмида кенгаш аъзолари бир қатор муҳим масалаларни ўртага ташлашди.

Жумладан, кенгаш раиси Фозилжон Отахонов “Баҳолашда асосан, шаклга эмас, мазмунга кўпроқ эътибор бериш лозимлигини хусусан, ҳужжатларнинг ишлаб чиқилгани ёки қабул қилингани эмас балки, амалиётга татбиқ этилгани, ходимлар фаолиятида қўлланилаётгани ва энг асосийси тизимда коррупциявий жиноятлар камайиш кўрсаткичлари устувор бўлиши керак” дея қайд этди.

Кенгаш аъзоси Мансур Бекмурадов аҳоли ўртасида ҳуқуқий тарғиботни амалга оширганлик, энг муҳим индикатор бўлиши лозимлигини билдирди.

Шунингдек, Кенгаш раиси ўринбосари Гулнора Бобожонова ташкилотлар фаолиятини баҳолаётганда уларнинг журналистлар ва оммавий ахборот воситалари билан ишлаш масаласини ҳам эътиборга олиш лозимлигини таъкидлади.

Кун тартибидаги иккинчи масала Давлат органлари ва ташкилотларида очиқлик бўйича амалга оширилган ишларнинг самарадорлигини баҳолашга қаратилган Очиқлик индекси натижалари юзасидан ҳам тақдимот амалга оширилди.

Қайд этилганидек, тартибга мувофиқ, Коррупцияга қарши курашиш агентлиги ҳар йили манфаатдор вазирлик ва идоралар билан бирга, давлат органлари ва ташкилотларининг соҳада амалга ошираётган ишлари самарадорлиги ҳамда натижадорлигини 84 та мезонини қамраб олган 8 та индикатор асосида баҳолаб борилди.

Ўтказилган ўрганиш ва мониторинг натижалари бўйича аниқланган камчиликларни бартараф этиш ҳамда ушбу фаолиятини тўғри йўлга қўйиш борасида вазирлик ва идораларнинг кўпчилигида қатъий ирода мавжудлиги таъкидланди.

Кенгаш аъзоларини ушбу йўналишдаги фаолиятига етарли эътибор қаратмай, очиқлик тизимини такомиллаштиришга сусткашлик муносабатида, қонунчиликда қатъий белгиланган маълумотларни очиқлашни ўз холига ташлаб қўйиш ҳолатлари юзасидан ўз таклиф ва тавсияларини беришди.

Хусусан, кенгаш аъзоси Юлдузхон Олимова бажарилган ишларни эътироф этиш зарурлигини, юқоридаги каби рейтинглар коррупцияга қарши тизимли курашишни бир кўриниши эканлигини таъкидлади. Ўз навбатида белгиланган талабларни мунтазам равишда бажармаётган вазирлик ва идораларга қатъий чоралар кўриш лозимлигини билдирди.

Кенгаш раиси Фозилжон Отахонов рейтингларни кенг жамоатчиликка тушунтиришда кенгаш аъзолари фаол бўлиши лозимлигини таъкидлади, шунингдек, мазкур кўрсаткичлар бўйича Агентликни ҳам муқобил баҳолашдан ўтказиш бўйича алоҳида механизмларни ишлаб чиқиш лозимлигини қайд этди.

Шунингдек, йиғилиш давомида кенгаш фаолиятига оид бошқа ташкилий масалалар ҳам кўриб чиқилди.