Joriy yilning 20-aprel kuni Korrupsiyaga qarshi kurashish agentligi huzuridagi Jamoatchilik kengashining navbatdagi yig‘ilishi bo‘lib o‘tdi.

Unda Korrupsiyaga qarshi kurashish agentligi tomonidan Korrupsiyaga qarshi kurashish ishlarining samaradorligini reyting baholash hamda Davlat organlari va tashkilotlarida ochiqlik bo‘yicha amalga oshirilgan ishlarning samaradorligini baholashga qaratilgan Ochiqlik indeksi natijalarinining taqdimoti amalga oshirildi  

Ushbu tadbirda reyting natijalari tahlili va past ko‘rsatkichli muassasa va tashkilotlar bilan olib borilayotgan ishlar muhokama etildi.

Dastlab, davlat organlari va tashkilotlari, shu jumladan, mahalliy ijro etuvchi hokimiyat organlarida korrupsiyaga qarshi kurashish bo‘yicha chora-tadbirlarning samaradorligi reyting baholash natijalari to‘g‘risida Agentlik mas’ul xodimi taqdimotni amalga oshirdi.

Ta’kidlanganidek, mazkur reytingda davlat tashkilotlarida korrupsiyaga qarshi kurashish bo‘yicha mexanizmlarning amaliyotga tatbiq etilganligi, korrupsiyaviy xavf-xatarlarni kamaytirilganligi, davlat tashkilotlari rahbarlarining korrupsiyaga qarshi murosasiz munosabatni ko‘rsatuvchi harakatlarining mavjudligi, xodimlarning korrupsiyaga qarshi kurashishga oid ichki tartiblardan xabardorligi, aholini ushbu illatga nisbatan murosasiz munosabatni shakllantirishga qaratilgan targ‘ibot tadbirlarining samaradorligi baholanadi.

O‘tkazilgan reyting baholash natijalari asosida davlat tashkilotlari tomonidan korrupsiyaga qarshi kurashish sohasida belgilangan vazifalarning qay darajada samarali amalga oshirilayotganini monitoring qilish bilan bir qatorda aniqlangan kamchiliklarni bartaraf etish, sohada sog‘lom raqobat muhitini kuchaytirish, tashkilot rahbarlarining mas’uliyatini oshirishga xizmat qiladi.

Savol va mulohazalar qissmida kengash a’zolari bir qator muhim masalalarni o‘rtaga tashlashdi.

Jumladan, kengash raisi Foziljon Otaxonov “Baholashda asosan, shaklga emas, mazmunga ko‘proq e’tibor berish lozimligini xususan, hujjatlarning ishlab chiqilgani yoki qabul qilingani emas balki, amaliyotga tatbiq etilgani, xodimlar faoliyatida qo‘llanilayotgani va eng asosiysi tizimda korrupsiyaviy jinoyatlar kamayish ko‘rsatkichlari ustuvor bo‘lishi kerak” deya qayd etdi.

Kengash a’zosi Mansur Bekmuradov aholi o‘rtasida huquqiy targ‘ibotni amalga oshirganlik, eng muhim indikator bo‘lishi lozimligini bildirdi.

Shuningdek, Kengash raisi o‘rinbosari Gulnora Bobojonova tashkilotlar faoliyatini baholayotganda ularning jurnalistlar va ommaviy axborot vositalari bilan ishlash masalasini ham e’tiborga olish lozimligini ta’kidladi.

Kun tartibidagi ikkinchi masala Davlat organlari va tashkilotlarida ochiqlik bo‘yicha amalga oshirilgan ishlarning samaradorligini baholashga qaratilgan Ochiqlik indeksi natijalari yuzasidan ham taqdimot amalga oshirildi.

Qayd etilganidek, tartibga muvofiq, Korrupsiyaga qarshi kurashish agentligi har yili manfaatdor vazirlik va idoralar bilan birga, davlat organlari va tashkilotlarining sohada amalga oshirayotgan ishlari samaradorligi hamda natijadorligini 84 ta mezonini qamrab olgan 8 ta indikator asosida baholab borildi.

O‘tkazilgan o‘rganish va monitoring natijalari bo‘yicha aniqlangan kamchiliklarni bartaraf etish hamda ushbu faoliyatini to‘g‘ri yo‘lga qo‘yish borasida vazirlik va idoralarning ko‘pchiligida qat’iy iroda mavjudligi ta’kidlandi.

Kengash a’zolarini ushbu yo‘nalishdagi faoliyatiga yetarli e’tibor qaratmay, ochiqlik tizimini takomillashtirishga sustkashlik munosabatida, qonunchilikda qat’iy belgilangan ma’lumotlarni ochiqlashni o‘z xoliga tashlab qo‘yish holatlari yuzasidan o‘z taklif va tavsiyalarini berishdi.

Xususan, kengash a’zosi Yulduzxon Olimova bajarilgan ishlarni e’tirof etish zarurligini, yuqoridagi kabi reytinglar korrupsiyaga qarshi tizimli kurashishni bir ko‘rinishi ekanligini ta’kidladi. O‘z navbatida belgilangan talablarni muntazam ravishda bajarmayotgan vazirlik va idoralarga qat’iy choralar ko‘rish lozimligini bildirdi.

Kengash raisi Foziljon Otaxonov reytinglarni keng jamoatchilikka tushuntirishda kengash a’zolari faol bo‘lishi lozimligini ta’kidladi, shuningdek, mazkur ko‘rsatkichlar bo‘yicha Agentlikni ham muqobil baholashdan o‘tkazish bo‘yicha alohida mexanizmlarni ishlab chiqish lozimligini qayd etdi.
 

Shuningdek, yig‘ilish davomida kengash faoliyatiga oid boshqa tashkiliy masalalar ham ko‘rib chiqildi.