Коррупцияга қарши курашиш агентлиги ҳамда Рақобатни ривожлантириш ва истеъмолчилар ҳуқуқларини ҳимоя қилиш қўмитаси ўртасида имзоланган ўзаро ҳамкорлик тўғрисидаги Меморандумда Қўмита тизимидаги ходимларнинг коррупцияга қарши куршиш борасидаги билим ва салоҳиятини оширишга қаратилган тадбирлар ташкил этиш асосий вазифалардан бири этиб белгиланган.

Шундан келиб чиққан ҳолда куни кеча Қўмита марказий аппарати, ҳудудий органлари ва идоравий мансуб ташкилот ходимлари учун “Коррупцияга қарши курашиш ҳар биримизнинг бурчимиз!” мавзусида ўқув семинар ўтказилди.

Унда Агентлик масъул ходимлари томонидан коррупцияга қарши курашишга оид халқаро стандартлар ва хорижий давлатлар тажрибаси, хусусан, коррупцияга қарши ички назорат тузилмалари — комплаенс-назорат тузилмаси фаолиятини самарали ташкил этиш масалаларига алоҳида урғу берилди.

Қайд этилганидек, Агентлик томонидан ўтган вақт мобайнида коррупцияга қарши ички назорат тизимини жорий этиш бўйича амалий тавсияларни ўз ичига олган қўлланма, мазкур тузилмалар фаолиятига оид намунавий ҳужжатлар тўплами ҳамда коррупцияга қарши курашиш ишларининг самарадорлигини рейтинг баҳолаш тизими орқали баҳолашдан ўтиш бўйича тавсиялар нашр этилиб, манфаатдор вазирлик ва идораларга тарқатилди.

Бу эса жорий йилда Агентлик томонидан ўтказилган коррупцияга қарши курашиш ишларининг самарадорлигини рейтинг баҳолаш жараёнлари олдидан давлат органлари ва ташкилотлари фаолияти учун муҳим амалий қўлланма бўлди.

Ўқув семинарда мазкур рейтингда (81-100 балл тўплаган ҳолда) “яхши” натижани қайд этган идора ва ташкилотлар мисолида коррупциявий хавф-хатарларни баҳолаш, манфаатлар тўқнашувини бошқариш, коррупция омилини истисно қилиш, ходимлар ва аҳоли ўртасида коррупцияга қарши муросасизликни кучайтиришга қаратилган ижобий тажриба ва ютуқлар хусусида атрофлича маълумот берилди.

Шунингдек, коррупцияга қарши курашиш борасидаги фаолиятни янада яхшилаш бўйича зарур билим-кўникмалар, аниқ таклиф ва амалий тавсиялар берилди.

Коррупцияга қарши курашиш агентлиги

Ахборот хизмати