Korrupsiyaga qarshi kurashish agentligi hamda Raqobatni rivojlantirish va isteʼmolchilar huquqlarini himoya qilish qo‘mitasi o‘rtasida imzolangan o‘zaro hamkorlik to‘g‘risidagi Memorandumda Qo‘mita tizimidagi xodimlarning korrupsiyaga qarshi kurshish borasidagi bilim va salohiyatini oshirishga qaratilgan tadbirlar tashkil etish asosiy vazifalardan biri etib belgilangan.

Shundan kelib chiqqan holda kuni kecha Qo‘mita markaziy apparati, hududiy organlari va idoraviy mansub tashkilot xodimlari uchun “Korrupsiyaga qarshi kurashish har birimizning burchimiz!” mavzusida o‘quv seminar o‘tkazildi.

Unda Agentlik masʼul xodimlari tomonidan korrupsiyaga qarshi kurashishga oid xalqaro standartlar va xorijiy davlatlar tajribasi, xususan, korrupsiyaga qarshi ichki nazorat tuzilmalari — komplayens-nazorat tuzilmasi faoliyatini samarali tashkil etish masalalariga alohida urg‘u berildi.

Qayd etilganidek, Agentlik tomonidan o‘tgan vaqt mobaynida korrupsiyaga qarshi ichki nazorat tizimini joriy etish bo‘yicha amaliy tavsiyalarni o‘z ichiga olgan qo‘llanma, mazkur tuzilmalar faoliyatiga oid namunaviy hujjatlar to‘plami hamda korrupsiyaga qarshi kurashish ishlarining samaradorligini reyting baholash tizimi orqali baholashdan o‘tish bo‘yicha tavsiyalar nashr etilib, manfaatdor vazirlik va idoralarga tarqatildi.

Bu esa joriy yilda Agentlik tomonidan o‘tkazilgan korrupsiyaga qarshi kurashish ishlarining samaradorligini reyting baholash jarayonlari oldidan davlat organlari va tashkilotlari faoliyati uchun muhim amaliy qo‘llanma bo‘ldi.

O‘quv seminarda mazkur reytingda (81-100 ball to‘plagan holda) “yaxshi” natijani qayd etgan idora va tashkilotlar misolida korrupsiyaviy xavf-xatarlarni baholash, manfaatlar to‘qnashuvini boshqarish, korrupsiya omilini istisno qilish, xodimlar va aholi o‘rtasida korrupsiyaga qarshi murosasizlikni kuchaytirishga qaratilgan ijobiy tajriba va yutuqlar xususida atroflicha maʼlumot berildi.

Shuningdek, korrupsiyaga qarshi kurashish borasidagi faoliyatni yana-da yaxshilash bo‘yicha zarur bilim-ko‘nikmalar, aniq taklif va amaliy tavsiyalar berildi.

Korrupsiyaga qarshi kurashish agentligi

Axborot xizmati