Коррупцияга қарши курашиш агентлиги томонидан давлат органлари фаолиятида коррупцияга қарши курашиш бўйича чора-тадбирларнинг самарадорлигини рейтинг баҳолашдан ўтказиш жараёнларида Рейтинг баҳолашни мустақил амалга оширувчи экспертлар гуруҳи ҳам фаол иштирок этиб келмоқда.

Мазкур экспертлар гуруҳи Агентлик директорининг тегишли буйруғига асосан, баҳолаш жараёнларининг шаффофлиги ва адолатлилигини таъминлаш мақсадида фуқаролик жамияти институтлари вакилларидан иборат таркибда шакллантирилади.

Хусусан, жорий йилда давлат органлари ва ташкилотларининг 2022 йил мобайнида коррупцияга қарши курашиш бўйича олиб борган чора-тадбирлари тўғрисида “E-anticor.uz” платформасига киритилган маълумотлар экспертлар гуруҳи томонидан чуқур таҳлил қилинди ва холис баҳоланди.

Бугун Агентлик раҳбарияти ҳамда экспертлар гуруҳи аъзоларининг учрашуви ташкил этилиб, Рейтинг баҳолаш тизимини келгусида такомиллаштириш имкониятлари, мавжуд камчиликлар ва уларнинг ечимлари билан боғлиқ масалалар атрофлича муҳокама қилинди.

Мулоқот мобайнида экспертлар томонидан баҳолаш жараёнлари самарадорлиги ва таъсирчанлигини ошириш юзасидан қатор таклиф ва тавсиялар билдирилди.

Жумладан, экспертлар гуруҳи раиси, “Тошкент медиация маркази” директори Диёрбек Кимсанов келгусида рейтинг асосида баҳоланадиган давлат органлари ва ташкилотлари қамровини кенгайтириш лозимлигини илгари сурди.

Экспертлар гуруҳи аъзоси, Ижтимоий ва иқтисодий ташаббуслар институти эксперти Дилфуза Куралова фикрича, баҳолашда асосан ҳужжатларнинг ишлаб чиқилгани ёки қабул қилингани эмас, балки амалиётга татбиқ этилгани, ходимлар фаолиятида қўлланилаётгани ҳамда тизимда коррупциявий жиноятлар камайиш кўрсаткичлари устувор бўлиши керак.

Экспертлар гуруҳининг яна бир аъзоси, медиа-юрист Мадина Турсунова эса баҳолаш мезонлари қаторига давлат ташкилотлари фаолияти очиқлигини киритиш, шунингдек, рейтинг натижаларини шакллантиришда кенг жамоатчилик фикрини ҳам инобатга олиш масаласига алоҳида урғу берди.

Муҳокамалар мобайнида давлат органларининг коррупцияга қарши курашиш бўйича фаолиятини кучайтириш ва экспертлар гуруҳи фаолиятига оид бошқа ташкилий масалалар ҳам кўриб чиқилди.

Коррупцияга қарши курашиш агентлиги

Ахборот хизмати