Korrupsiyaga qarshi kurashish agentligi tomonidan davlat organlari faoliyatida korrupsiyaga qarshi kurashish bo‘yicha chora-tadbirlarning samaradorligini reyting baholashdan o‘tkazish jarayonlarida Reyting baholashni mustaqil amalga oshiruvchi ekspertlar guruhi ham faol ishtirok etib kelmoqda.

Mazkur ekspertlar guruhi Agentlik direktorining tegishli buyrug‘iga asosan, baholash jarayonlarining shaffofligi va adolatliligini taʼminlash maqsadida fuqarolik jamiyati institutlari vakillaridan iborat tarkibda shakllantiriladi.

Xususan, joriy yilda davlat organlari va tashkilotlarining 2022-yil mobaynida korrupsiyaga qarshi kurashish bo‘yicha olib borgan chora-tadbirlari to‘g‘risida “E-anticor.uz” platformasiga kiritilgan maʼlumotlar ekspertlar guruhi tomonidan chuqur tahlil qilindi va xolis baholandi.

Bugun Agentlik rahbariyati hamda ekspertlar guruhi aʼzolarining uchrashuvi tashkil etilib, Reyting baholash tizimini kelgusida takomillashtirish imkoniyatlari, mavjud kamchiliklar va ularning yechimlari bilan bog‘liq masalalar atroflicha muhokama qilindi.

Muloqot mobaynida ekspertlar tomonidan baholash jarayonlari samaradorligi va taʼsirchanligini oshirish yuzasidan qator taklif va tavsiyalar bildirildi.

Jumladan, ekspertlar guruhi raisi, “Toshkent mediatsiya markazi” direktori Diyorbek Kimsanov kelgusida reyting asosida baholanadigan davlat organlari va tashkilotlari qamrovini kengaytirish lozimligini ilgari surdi.

Ekspertlar guruhi aʼzosi, Ijtimoiy va iqtisodiy tashabbuslar instituti eksperti Dilfuza Kuralova fikricha, baholashda asosan hujjatlarning ishlab chiqilgani yoki qabul qilingani emas, balki amaliyotga tatbiq etilgani, xodimlar faoliyatida qo‘llanilayotgani hamda tizimda korrupsiyaviy jinoyatlar kamayish ko‘rsatkichlari ustuvor bo‘lishi kerak.

Ekspertlar guruhining yana bir aʼzosi, media-yurist Madina Tursunova esa baholash mezonlari qatoriga davlat tashkilotlari faoliyati ochiqligini kiritish, shuningdek, reyting natijalarini shakllantirishda keng jamoatchilik fikrini ham inobatga olish masalasiga alohida urg‘u berdi.

Muhokamalar mobaynida davlat organlarining korrupsiyaga qarshi kurashish bo‘yicha faoliyatini kuchaytirish va ekspertlar guruhi faoliyatiga oid boshqa tashkiliy masalalar ham ko‘rib chiqildi.

Korrupsiyaga qarshi kurashish agentligi

 Axborot xizmati