Бугун Бухоро вилояти коррупцияга қарши курашиш ҳудудий кенгашининг навбатдаги йиғилиши бўлиб ўтди. Йиғилишда вилоятда коррупциянинг олдини олиш бўйича амалга оширилаётган ишлар ҳолати, ҳудудий кенгашнинг ўтган даврдаги фаолияти, 2022 йил бўйича коррупцияга қарши курашиш ва очиқликни таъминлаш борасидаги рейтинглардаги натижалари кўриб чиқилди.

Унда Коррупцияга қарши курашиш агентлиги раҳбарияти, Олий Мажлис Сенати вакиллари, коррупцияга қарши курашиш бўйича ҳудудий кенгаш аъзолари, ОАВ ва нодавлат нотижорат ташкилотлари вакиллари, шунингдек, ҳудудий студиялардан туманлар ва шаҳарлар ҳокимлари иштирок этишди.

Тадбирда очиқликни таъминлаш бўйича амалга оширилган ишлар ва йўл қўйилган камчиликлар ҳам танқидий-таҳлилий кўриб чиқилди. Масъулларга очиқликка оид қонунчилик ҳужжатлари талабларига риоя этиш, очиқ маълумотларни ўз вақтида, тўғри ва тўлиқ эълон қилиб бориш билан боғлиқ аниқ вазифалар берилди.

Шунингдек, коррупцияга қарши курашиш бўйича чора-тадбирларнинг самарадорлиги рейтингини баҳолаш натижалари муҳокама қилинди. Ҳокимликнинг коррупцияга қарши курашиш борасидаги фаолиятини янада яхшилаш бўйича тизимли ишларни йўлга қўйиш, жумладан, ходимларнинг коррупцияга қарши курашиш бўйича билим ва кўникмаларини ошириб бориш зарурлиги қайд этилди.

Якунда келгусида вилоятда коррупциянинг олдини олиш ишларини жадаллаштириш, рейтинг ва индексларда ўрнини яхшилаш юзасидан аниқ чоралар белгилаб олинди.

Коррупцияга қарши курашиш агентлиги

Ахборот хизмати