Bugun Buxoro viloyati korrupsiyaga qarshi kurashish hududiy kengashining navbatdagi yig‘ilishi bo‘lib o‘tdi. Yig‘ilishda viloyatda korrupsiyaning oldini olish bo‘yicha amalga oshirilayotgan ishlar holati, hududiy kengashning o‘tgan davrdagi faoliyati, 2022-yil bo‘yicha korrupsiyaga qarshi kurashish va ochiqlikni taʼminlash borasidagi reytinglardagi natijalari ko‘rib chiqildi.

Unda Korrupsiyaga qarshi kurashish agentligi rahbariyati, Oliy Majlis Senati vakillari, korrupsiyaga qarshi kurashish bo‘yicha hududiy kengash aʼzolari, OAV va nodavlat notijorat tashkilotlari vakillari, shuningdek, hududiy studiyalardan tumanlar va shaharlar hokimlari ishtirok etishdi.

Tadbirda ochiqlikni taʼminlash bo‘yicha amalga oshirilgan ishlar va yo‘l qo‘yilgan kamchiliklar ham tanqidiy-tahliliy ko‘rib chiqildi. Masʼullarga ochiqlikka oid qonunchilik hujjatlari talablariga rioya etish, ochiq maʼlumotlarni o‘z vaqtida, to‘g‘ri va to‘liq eʼlon qilib borish bilan bog‘liq aniq vazifalar berildi.

Shuningdek, korrupsiyaga qarshi kurashish bo‘yicha chora-tadbirlarning samaradorligi reytingini baholash natijalari muhokama qilindi. Hokimlikning korrupsiyaga qarshi kurashish borasidagi faoliyatini yanada yaxshilash bo‘yicha tizimli ishlarni yo‘lga qo‘yish, jumladan, xodimlarning korrupsiyaga qarshi kurashish bo‘yicha bilim va ko‘nikmalarini oshirib borish zarurligi qayd etildi.

Yakunda kelgusida viloyatda korrupsiyaning oldini olish ishlarini jadallashtirish, reyting va indekslarda o‘rnini yaxshilash yuzasidan aniq choralar belgilab olindi.

Korrupsiyaga qarshi kurashish agentligi

Axborot xizmati