Коррупцияга қарши курашиш агентлиги томонидан нодавлат олий таълим муассасалари ташкил этиш фаолиятини лицензиялаш билан боғлиқ коррупциявий хавф-хатарлар таҳлил қилинди.

Таҳлиллар давомида ушбу йўналишда масъул ташкилотлар томонидан белгиланган вазифалар самарали амалга оширилмаётгани, норматив-ҳуқуқий бўшлиқлар ва бошқа коррупциявий хавф-хатарларга мойил бўлган ҳолатлар мавжудлиги аниқланди.

Жумладан, 2022-2023 йиллар давомида фаолияти лицензияланган 65 та нодавлат олий таълим муассасаларидан 38 тасига лицензия беришда 82 та ҳолатда турли камчилик ва қонунбузилиш ҳолатларига йўл қўйилган.

Хусусан, 22 та ҳолатда талабгорларга давлат ёнғин назорати ва санитария-эпидемиология хизмати органларининг тегишли хулосалари олинмаган ҳолда лицензия берилган.

Бундан ташқари, талабларга мувофиқ нодавлат таълим хизматларини кўрсатиш таълим-тарбия жараёнини давлат таълим стандартларига (давлат таълим талабларига), ўқув режа ва дастурларига, шунингдек, таълим ташкилотлари томонидан мустақил ишлаб чиқилиб, лицензия олиш пайтида тақдим этилган ўқув дастурларига мувофиқ ташкил этилиши белгиланган.

Бироқ, талабгорлар томонидан ушбу талабларга мувофиқ электрон тизимга ўқув режа ва фан дастурлари тўлиқ юкланмаган ёки умуман юкланмаган ҳолатларда уларга лицензиялар бериб келинган.

Хусусан, талабгорлар томонидан 8 та ҳолатда мустақил ўқув режалари ишлаб чиқилмаган ҳолда давлат олий таълим муассасаси ўқув режалари юклаган, 2 та ҳолатда ўқув режалари умуман юкланмаган, 4 та ҳолатда ўқув режалари тўлиқ юкланмаган ёки тасдиқланмаган шаклда юкланган бўлса-да, уларга лицензиялар берилган.

Бундан ташқари, талабгорлар томонидан 15 та ҳолатда фан дастурлари умуман юкланмаган, 11 та ҳолатда фан даструлари курслар бўйича тўлиқ юкланмаган ёки тасдиқланмаган шаклда юкланган, 3 та ҳолатда мустақил фан дастурлари ишлаб чиқилмаган ҳолда давлат олий таълим муассасаси фан дастурлари юклаган бўлишига қарамай, уларга ҳам лицензиялар берилишига йўл қўйилган.

Таҳлил якунлари бўйича Агентлик томонидан нодавлат олий таълим муассасаларини ташкил этиш фаолиятини лицензиялаш соҳасида мавжуд коррупциявий хавф-хатарларни бартараф этишга қаратилган таклифлар ишлаб чиқилди ва Ўзбекистон Республикаси Президенти Администрациясига киритилди.

Коррупцияга қарши курашиш агентлиги
Ахборот хизмати