Korrupsiyaga qarshi kurashish agentligi tomonidan nodavlat oliy taʼlim muassasalari tashkil etish faoliyatini litsenziyalash bilan bog‘liq korrupsiyaviy xavf-xatarlar tahlil qilindi.

Tahlillar davomida ushbu yo‘nalishda masʼul tashkilotlar tomonidan belgilangan vazifalar samarali amalga oshirilmayotgani, normativ-huquqiy bo‘shliqlar va boshqa korrupsiyaviy xavf-xatarlarga moyil bo‘lgan holatlar mavjudligi aniqlandi.

Jumladan, 2022-2023 yillar davomida faoliyati litsenziyalangan 65 ta nodavlat oliy taʼlim muassasalaridan 38 tasiga litsenziya berishda 82 ta holatda turli kamchilik va qonunbuzilish holatlariga yo‘l qo‘yilgan.

Xususan, 22 ta holatda talabgorlarga davlat yong‘in nazorati va sanitariya-epidemiologiya xizmati organlarining tegishli xulosalari olinmagan holda litsenziya berilgan.

Bundan tashqari, talablarga muvofiq nodavlat taʼlim xizmatlarini ko‘rsatish taʼlim-tarbiya jarayonini davlat taʼlim standartlariga (davlat taʼlim talablariga), o‘quv reja va dasturlariga, shuningdek, taʼlim tashkilotlari tomonidan mustaqil ishlab chiqilib, litsenziya olish paytida taqdim etilgan o‘quv dasturlariga muvofiq tashkil etilishi belgilangan.

Biroq, talabgorlar tomonidan ushbu talablarga muvofiq elektron tizimga o‘quv reja va fan dasturlari to‘liq yuklanmagan yoki umuman yuklanmagan holatlarda ularga litsenziyalar berib kelingan.

Xususan, talabgorlar tomonidan 8 ta holatda mustaqil o‘quv rejalari ishlab chiqilmagan holda davlat oliy taʼlim muassasasi o‘quv rejalari yuklagan, 2 ta holatda o‘quv rejalari umuman yuklanmagan, 4 ta holatda o‘quv rejalari to‘liq yuklanmagan yoki tasdiqlanmagan shaklda yuklangan bo‘lsa-da, ularga litsenziyalar berilgan.

Bundan tashqari, talabgorlar tomonidan 15 ta holatda fan dasturlari umuman yuklanmagan, 11 ta holatda fan dastrulari kurslar bo‘yicha to‘liq yuklanmagan yoki tasdiqlanmagan shaklda yuklangan, 3 ta holatda mustaqil fan dasturlari ishlab chiqilmagan holda davlat oliy taʼlim muassasasi fan dasturlari yuklagan bo‘lishiga qaramay, ularga ham litsenziyalar berilishiga yo‘l qo‘yilgan.

Tahlil yakunlari bo‘yicha Agentlik tomonidan nodavlat oliy taʼlim muassasalarini tashkil etish faoliyatini litsenziyalash sohasida mavjud korrupsiyaviy xavf-xatarlarni bartaraf etishga qaratilgan takliflar ishlab chiqildi va O‘zbekiston Respublikasi Prezidenti Administratsiyasiga kiritildi.

Korrupsiyaga qarshi kurashish agentligi

Axborot xizmati