Бирлашган Миллатлар Ташкилоти Гиёҳванд моддалар ва жиноятчиликка қарши курашиш бошқармаси(БМТ ГЖБ)нинг таклифига асосан, Ўзбекистон Республикаси Коррупцияга қарши курашиш агентлиги директори ўринбосари У.Тухташева БМТ ГЖБ бош котибиятида бўлиб ўтаётган Конвенция имплементациясини кўриб чиқиш гуруҳининг 14-сессиясида маъруза билан иштирок этди.

Маълумот учун: БМТнинг Коррупцияга қарши конвенцияси иштирокчи-давлатлари конференцияси – Конвенцияга аъзо давлатлари томонидан халқаро шартноманинг имплементацияси, амалиётчилар ўртасида тажриба ва билимлар алмашиш ҳамда кун тартибидаги муҳим масалаларни муҳокама қилиш учун халқаро майдон ҳисобланади. Конференция сессияларига 180 дан ортиқ давлатлар аксилкоррупция идоралари таклиф этилган.

Ўзбекистон вакили ўз маърузасида Конвенциянинг 12-моддаси (Хусусий сектор) ҳамда БМТ Бош ассамблеясининг 2021 йил йил 2 июнь кунги резолюцияси билан тасдиқланган Сиёсий декларациянинг тегишли бандлари ижроси ва амалга оширилиши бўйича батафсил маълумот берди.

Жумладан, Ўзбекистон Республикасининг коррупцияга қарши курашиш сиёсати ва унинг асосий йўналишлари, шу жумладан бизнес ҳамжамиятда ҳалолликни таъминлаш ва тадбиркорлик соҳасида коррупциянинг олдини олиш бўйича тадбиқ этилаётган лойиҳалар тўғрисида тўхталиб ўтилди.

Музокаралар доирасида бошқа давлат вакиллари Ўзбекистон маърузачисига саволлар билан юзланиб, бу борадаги тажриба бўйича маълумотга эга бўлдилар.

Хусусан, Агентлик директори ўринбосари томонидан тадбиркорлик соҳасида коррупциянинг олдини олиш масалаларида гендер жиҳатларга эътибор қаратилаётганлиги, ушбу жараёнда грантлар орқали нодавлат нотижорат ташкилотлари билан ҳамкорликда лойиҳалар амалга оширилаётганлиги бўйича айтиб ўтилди.

Ўзбекистонда мазкур йўналишдаги амалиёт сессия иштирокчилари томонидан юқори баҳоланиб, муҳокамалар давомида бошқа давлатларнинг ҳам ушбу йўналишдаги тажрибалари тингланди.

Коррупцияга қаршщи курашиш агентлиги

Ахборот хизмати