Birlashgan Millatlar Tashkiloti Giyohvand moddalar va jinoyatchilikka qarshi kurashish boshqarmasi(BMT GJB)ning taklifiga asosan, O‘zbekiston Respublikasi Korrupsiyaga qarshi kurashish agentligi direktori o‘rinbosari U.Tuxtasheva BMT GJB bosh kotibiyatida bo‘lib o‘tayotgan Konvensiya implementatsiyasini ko‘rib chiqish guruhining 14-sessiyasida maʼruza bilan ishtirok etdi.

Maʼlumot uchun: BMTning Korrupsiyaga qarshi konvensiyasi ishtirokchi-davlatlari konferensiyasi – Konvensiyaga aʼzo davlatlari tomonidan xalqaro shartnomaning implementatsiyasi, amaliyotchilar o‘rtasida tajriba va bilimlar almashish hamda kun tartibidagi muhim masalalarni muhokama qilish uchun xalqaro maydon hisoblanadi. Konferensiya sessiyalariga 180 dan ortiq davlatlar aksilkorrupsiya idoralari taklif etilgan.

O‘zbekiston vakili o‘z maʼruzasida Konvensiyaning 12-moddasi (Xususiy sektor) hamda BMT Bosh assambleyasining 2021 yil yil 2 iyun kungi rezolyutsiyasi bilan tasdiqlangan Siyosiy deklaratsiyaning tegishli bandlari ijrosi va amalga oshirilishi bo‘yicha batafsil maʼlumot berdi.

Jumladan, O‘zbekiston Respublikasining korrupsiyaga qarshi kurashish siyosati va uning asosiy yo‘nalishlari, shu jumladan biznes hamjamiyatda halollikni taʼminlash va tadbirkorlik sohasida korrupsiyaning oldini olish bo‘yicha tadbiq etilayotgan loyihalar to‘g‘risida to‘xtalib o‘tildi.

Muzokaralar doirasida boshqa davlat vakillari O‘zbekiston maʼruzachisiga savollar bilan yuzlanib, bu boradagi tajriba bo‘yicha maʼlumotga ega bo‘ldilar.

Xususan, Agentlik direktori o‘rinbosari tomonidan tadbirkorlik sohasida korrupsiyaning oldini olish masalalarida gender jihatlarga eʼtibor qaratilayotganligi, ushbu jarayonda grantlar orqali nodavlat notijorat tashkilotlari bilan hamkorlikda loyihalar amalga oshirilayotganligi bo‘yicha aytib o‘tildi.

O‘zbekistonda mazkur yo‘nalishdagi amaliyot sessiya ishtirokchilari tomonidan yuqori baholanib, muhokamalar davomida boshqa davlatlarning ham ushbu yo‘nalishdagi tajribalari tinglandi.

Korrupsiyaga qarshщi kurashish agentligi

Axborot xizmati