Жорий йилнинг 20 июнь куни Агентлик раҳбарияти ҳамда ЕҲХТнинг Иқтисодий ва экологик фаолияти координатори Игли Хасани  ўртасида учрашув бўлиб ўтди.

Учрашувда Агентлик ва ЕХҲТ ҳамкорлигининг асосий натижалари ҳамда истиқболдаги режалар атрофлича  муҳокама қилинди.

Айтиш жоиз, ЕХҲТ Агентлик муҳим халқаро ҳамкорлардан бири бўлиб келмоқда. Хусусан,  2021 йилда ЕХҲТ минтақаси мамлакатларининг коррупцияга қарши курашувчи идоралари билан ўзаро алоқалар ўрнатилди, шунингдек, ЕХҲТнинг иқтисодий ва экологик ўлчовлари бўйича котибияти билан Меморандум имзоланди.

ЕХҲТнинг Ўзбекистондаги лойиҳалари координатори билан 2021-2022 йилларга мўлжалланган Ҳаракатлар режаси имзоланди. Очиқлик индекси методологияси ва давлат органлари фаолиятининг очиқлигини таъминлаш бўйича олиб борилаётган ишлар самарадорлигини баҳолашга қаратилган “Open Index» электрон платформаси ишлаб чиқилишида ҳам айнан мазкур ташкилотнинг экспертлик ва техник кўмаги муҳим аҳамият касб этди. 

Учрашувда икки идора ўртасидаги ана шундай самарали ҳамкорликни изчил давом эттириш ва тизимлаштириш масалалари юзасидан ўзаро фикр алмашилди.

Жумладан,  Агентлик томонидан ЕХҲТ экспертлари ва “Очиқ маълумотлар хартияси” халқаро ташкилоти кўмагида “Очиқ Ҳукумат ҳамкорлиги” (Open Government Partnership, OGP) халқаро ташкилотига Ўзбекистоннинг аъзо бўлиш масаласини кўриб чиқиш  таклифи илгари сурилди.

Шунингдек, Ўзбекистонда илк бор жорий этилган Очиқлик индексининг ижобий натижаларини инобатга олган ҳолда, Индексни баҳолаш бўйича методикани янада такомиллаштириш, жумладан, баҳолаш жараёнида  маҳаллий давлат бошқаруви органлари фаолиятини ҳам қамраб олиш масалаларига алоҳида тўхталиб ўтилди.

Бундан ташқари, учрашувда корруцияга қарши курашиш жараёнларига фуқаролик жамияти институтлари, хусусан, нодавлат нотижорат ташкилотлари, оммавий ахборот воситалари ҳамда кенг жамоатчиликни фаол жалб этиш, бу борада малака ошириш курслари, семинар-тренинглар ташкил этиш ва шу орқали коррупцияга нисбатан муросасизликни ҳамда жамоатчилик назоратини янада кучайтириш истиқболдаги ҳамкорликнинг асосий йўналишларидан бири сифатида  эътибор марказида бўлди.

Игли Хасани бу каби таклиф ва ташаббусларнинг муҳим аҳамиятини  эътироф этиб, ЕХҲТ уларни қўллаб-қувватлашга ҳамда Агентлик билан ҳамкорликни янги босқичда давом эттиришга тайёр эканлигини билдирди.

Коррупцияга қарши курашиш агентлиги

Ахборот хизмати