Joriy yilning 20-iyun kuni Agentlik rahbariyati hamda YHXTning Iqtisodiy va ekologik faoliyati koordinatori Igli Xasani o‘rtasida uchrashuv bo‘lib o‘tdi.

Uchrashuvda Agentlik va YXHT hamkorligining asosiy natijalari hamda istiqboldagi rejalar atroflicha muhokama qilindi.

Aytish joiz, YXHT Agentlik muhim xalqaro hamkorlardan biri bo‘lib kelmoqda. Xususan, 2021-yilda YXHT mintaqasi mamlakatlarining korrupsiyaga qarshi kurashuvchi idoralari bilan o‘zaro aloqalar o‘rnatildi, shuningdek, YXHTning iqtisodiy va ekologik o‘lchovlari bo‘yicha kotibiyati bilan Memorandum imzolandi.

YXHTning O‘zbekistondagi loyihalari koordinatori bilan 2021-2022-yillarga mo‘ljallangan Harakatlar rejasi imzolandi. Ochiqlik indeksi metodologiyasi va davlat organlari faoliyatining ochiqligini taʼminlash bo‘yicha olib borilayotgan ishlar samaradorligini baholashga qaratilgan “Open Index» elektron platformasi ishlab chiqilishida ham aynan mazkur tashkilotning ekspertlik va texnik ko‘magi muhim ahamiyat kasb etdi. 

Uchrashuvda ikki idora o‘rtasidagi ana shunday samarali hamkorlikni izchil davom ettirish va tizimlashtirish masalalari yuzasidan o‘zaro fikr almashildi.

Jumladan, Agentlik tomonidan YXHT ekspertlari va “Ochiq maʼlumotlar xartiyasi” xalqaro tashkiloti ko‘magida “Ochiq Hukumat hamkorligi” (Open Government Partnership, OGP) xalqaro tashkilotiga O‘zbekistonning aʼzo bo‘lish masalasini ko‘rib chiqish  taklifi ilgari surildi.

Shuningdek, O‘zbekistonda ilk bor joriy etilgan Ochiqlik indeksining ijobiy natijalarini inobatga olgan holda, Indeksni baholash bo‘yicha metodikani yanada takomillashtirish, jumladan, baholash jarayonida  mahalliy davlat boshqaruvi organlari faoliyatini ham qamrab olish masalalariga alohida to‘xtalib o‘tildi.

Bundan tashqari, uchrashuvda korrutsiyaga qarshi kurashish jarayonlariga fuqarolik jamiyati institutlari, xususan, nodavlat notijorat tashkilotlari, ommaviy axborot vositalari hamda keng jamoatchilikni faol jalb etish, bu borada malaka oshirish kurslari, seminar-treninglar tashkil etish va shu orqali korrupsiyaga nisbatan murosasizlikni hamda jamoatchilik nazoratini yanada kuchaytirish istiqboldagi hamkorlikning asosiy yo‘nalishlaridan biri sifatida  eʼtibor markazida bo‘ldi.

Igli Xasani bu kabi taklif va tashabbuslarning muhim ahamiyatini  eʼtirof etib, YXHT ularni qo‘llab-quvvatlashga hamda Agentlik bilan hamkorlikni yangi bosqichda davom ettirishga tayyor ekanligini bildirdi.

Korrupsiyaga qarshi kurashish agentligi

Axborot xizmati