26 июнь куни АҚШнинг Вашингтон шаҳрида “Тараққиёт учун коррупцияга қарши: ишончни тиклаш” мавзусидаги глобал форум (AC4D) ўз ишини бошлади. 

Форумдан кўзланган асосий мақсад  сиёсатчилар ва амалиётчилар ўртасида билим ва тажриба алмашиш, ҳамкорлик соҳалари ва устувор йўналишларни аниқлаш, жумладан, бенефициар эгалик ҳуқуқини ошкор қилиш тартибларининг шаффофлиги, маълумотлар ва технологияларнинг қўлланиши, харидлар ва шартномаларни бошқариш, ҳисобдорлик институтлари ва қонун устуворлигини таъминлаш каби мавзуларда муҳокамалар олиб боришдир.

Маълумот учун:  Икки кунлик Форумда коррупцияга қарши курашиш ва ҳалоллик соҳасида фаолият юритувчи ҳукумат, хусусий бизнес, илмий доиралар, фуқаролик жамияти, жамғармалар ва бошқа халқаро ривожланиш ташкилотларидан 150га яқин ҳамкорлар, етакчилар ва амалиётчилар иштирок этмоқда. 

Олий даражадаги сессиялар мобайнида изчил ва барқарор тараққиётда коррупцияга қарши курашишнинг долзарблиги, бу борада институционал ўзгаришларга ҳисса қўшувчи омиллар, хизмат кўрсатиш жараёнларида коррупцияга қарши кураш, аҳолининг коррупция ва унинг оқибатлари тўғрисида хабардорлигини ошириш масалаларига эътибор қаратилмоқда.

Шунингдек, муҳокамалар жараёнида коррупцияга мойил шахслар ва ташкилотларни фош этиш, коррупцияга оид айбловларни аниқлашда журналистик суриштирувнинг роли, меъёрий-ҳуқуқий ҳужжатларга риоя қилиш, коррупциянинг олдини олиш, аниқлаш, хавф-хатар юқори бўлган муҳитларга сармоя киритишдаги қийинчилик ва хавф-хатарларга ҳам алоҳида урғу берилмоқда. 

Хусусан, Глобал Форумнинг “Ҳисобдорлик институтларининг роли” мавзусига   бағишланган ялпи сессиясида Коррупцияга қарши курашиш агентлиги директори А.Бурханов  маъруза билан иштирок этиб, хорижий вакилларга Ўзбекистонда коррупцияга қарши курашнинг асосий воситалари – очиқлик, ошкоралик ва ҳисобдорликни таъминлашда коррупцияга қарши курашувчи идоралар ва улар томонидан амалга оширилаётган ишларнинг самаралари хусусида батафсил маълумот берди.  

Бу ўринда Агентликнинг коррупцияга қарши курашиш соҳасида давлат сиёсатини шакллантириш ва амалга ошириш, ушбу йўналишдаги масъул давлат органлари фаолиятини мувофиқлаштириш, шунингдек, жамоатчилик билан ўзаро ҳамкорликни таъминлаш борасидаги фаолияти натижалари  иштирокчилар эътиборига ҳавола этилди. 

Жумладан, давлат идоралари ва ташкилотларида коррупциянинг олдини олиш ва уни бартараф этишга масъул бўлган комплаенс-назорат тузилмалари фаолияти, коррупцияга қарши кураш самарадорлигини баҳолаш бўйича рейтинг тизими, барча давлат харидлари тартиб-таомилларининг мажбурий тартибда электрон шаклда ўтказилиши, бенефициар мулкдор тўғрисидаги маълумотларни ошкор қилиш тартиби, очиқ эълон қилиниши лозим бўлган маълумотлар рўйхати ҳамда Очиқлик индекси тизими жорий этилганлиги қайд этилди.

А.Бурханов, шунингдек, ижро этувчи ҳокимият органлари, аудиторлик институтлари, суд ва коррупцияга қарши курашиш органлари ўртасида самарали мувофиқлаштириш ва ахборот алмашиш механизмлари, бу борада мавжуд амалиёт ва тажрибалар хусусида ҳам тўхталиб ўтди.  

Муҳокамалар жараёнида иштирокчи давлатлар томонидан Ўзбекистонда коррупцияга қарши курашиш жараёнларига самарали механизмларни татбиқ этиш, хусусан, давлат органларининг очиқлиги ва ҳисобдорлигини таъминлашда сезиларли ютуқларга эришилаётгани эътироф этилди. 

Жумладан, давлат органлари ва ташкилотлари фаолиятида муҳим маълумотларнинг очиқлаш орқали жамоатчилик назоратини ўрнатиш ва ҳисобдорликни таъминлашда қўлланилаётган аниқ механизмларга алоҳида қизиқиш билдирилди.