26-iyun kuni AQSHning Vashington shahrida “Taraqqiyot uchun korrupsiyaga qarshi: ishonchni tiklash” mavzusidagi global forum (AC4D) o‘z ishini boshladi. 

Forumdan ko‘zlangan asosiy maqsad  siyosatchilar va amaliyotchilar o‘rtasida bilim va tajriba almashish, hamkorlik sohalari va ustuvor yo‘nalishlarni aniqlash, jumladan, benefitsiar egalik huquqini oshkor qilish tartiblarining shaffofligi, ma’lumotlar va texnologiyalarning qo‘llanishi, xaridlar va shartnomalarni boshqarish, hisobdorlik institutlari va qonun ustuvorligini ta’minlash kabi mavzularda muhokamalar olib borishdir.

Ma’lumot uchun:  Ikki kunlik Forumda korrupsiyaga qarshi kurashish va halollik sohasida faoliyat yurituvchi hukumat, xususiy biznes, ilmiy doiralar, fuqarolik jamiyati, jamg‘armalar va boshqa xalqaro rivojlanish tashkilotlaridan 150ga yaqin hamkorlar, yetakchilar va amaliyotchilar ishtirok etmoqda. 

Oliy darajadagi sessiyalar mobaynida izchil va barqaror taraqqiyotda korrupsiyaga qarshi kurashishning dolzarbligi, bu borada institutsional o‘zgarishlarga hissa qo‘shuvchi omillar, xizmat ko‘rsatish jarayonlarida korrupsiyaga qarshi kurash, aholining korrupsiya va uning oqibatlari to‘g‘risida xabardorligini oshirish masalalariga e’tibor qaratilmoqda.

Shuningdek, muhokamalar jarayonida korrupsiyaga moyil shaxslar va tashkilotlarni fosh etish, korrupsiyaga oid ayblovlarni aniqlashda jurnalistik surishtiruvning roli, me’yoriy-huquqiy hujjatlarga rioya qilish, korrupsiyaning oldini olish, aniqlash, xavf-xatar yuqori bo‘lgan muhitlarga sarmoya kiritishdagi qiyinchilik va xavf-xatarlarga ham alohida urg‘u berilmoqda. 

Xususan, Global Forumning “Hisobdorlik institutlarining roli” mavzusiga   bag‘ishlangan yalpi sessiyasida Korrupsiyaga qarshi kurashish agentligi direktori A.Burxanov  ma’ruza bilan ishtirok etib, xorijiy vakillarga O‘zbekistonda korrupsiyaga qarshi kurashning asosiy vositalari – ochiqlik, oshkoralik va hisobdorlikni ta’minlashda korrupsiyaga qarshi kurashuvchi idoralar va ular tomonidan amalga oshirilayotgan ishlarning samaralari xususida batafsil ma’lumot berdi.  

Bu o‘rinda Agentlikning korrupsiyaga qarshi kurashish sohasida davlat siyosatini shakllantirish va amalga oshirish, ushbu yo‘nalishdagi mas’ul davlat organlari faoliyatini muvofiqlashtirish, shuningdek, jamoatchilik bilan o‘zaro hamkorlikni ta’minlash borasidagi faoliyati natijalari  ishtirokchilar e’tiboriga havola etildi. 

Jumladan, davlat idoralari va tashkilotlarida korrupsiyaning oldini olish va uni bartaraf etishga mas’ul bo‘lgan komplayens-nazorat tuzilmalari faoliyati, korrupsiyaga qarshi kurash samaradorligini baholash bo‘yicha reyting tizimi, barcha davlat xaridlari tartib-taomillarining majburiy tartibda elektron shaklda o‘tkazilishi, benefitsiar mulkdor to‘g‘risidagi ma’lumotlarni oshkor qilish tartibi, ochiq e’lon qilinishi lozim bo‘lgan ma’lumotlar ro‘yxati hamda Ochiqlik indeksi tizimi joriy etilganligi qayd etildi.

A.Burxanov, shuningdek, ijro etuvchi hokimiyat organlari, auditorlik institutlari, sud va korrupsiyaga qarshi kurashish organlari o‘rtasida samarali muvofiqlashtirish va axborot almashish mexanizmlari, bu borada mavjud amaliyot va tajribalar xususida ham to‘xtalib o‘tdi.  

Muhokamalar jarayonida ishtirokchi davlatlar tomonidan O‘zbekistonda korrupsiyaga qarshi kurashish jarayonlariga samarali mexanizmlarni tatbiq etish, xususan, davlat organlarining ochiqligi va hisobdorligini ta’minlashda sezilarli yutuqlarga erishilayotgani e’tirof etildi. 

Jumladan, davlat organlari va tashkilotlari faoliyatida muhim ma’lumotlarning ochiqlash orqali jamoatchilik nazoratini o‘rnatish va hisobdorlikni ta’minlashda qo‘llanilayotgan aniq mexanizmlarga alohida qiziqish bildirildi.