Жорий йилнинг 6 июль куни Коррупцияга қарши курашиш агентлиги директори А.Бурханов БМТ Тараққиёт дастури (БМТ ТД)нинг Ўзбекистондаги вакили Матилда Димовскани қабул қилди.

Учрашувда ўтган 3 йил давомидаги ўзаро ҳамкорлик натижалари сарҳисоб қилиниб, келгусидаги режа ва вазифалар юзасидан ўзаро фикр алмашилди.

Айтиш жоиз, БМТ ТД Агентлик фаолиятининг дастлабки давриданоқ барча муҳим ташаббус ва таклифларни қўллаб-қувватлаб келаётган асосий ҳамкорлардан бири саналади.

Ўтган вақт ичида биргаликдаги саъй-ҳаракатлар орқали бир қатор самарали лойиҳалар амалга оширилиб, муҳим натижаларга эришилди.

Жумладан, коррупцияга қарши курашиш сиёсатига оид ҳужжатлар ишлаб чиқилди, фуқароларнинг мурожаатларини онлайн қабул қилиш тизими, давлат органлари ва ташкилотларида коррупцияга қарши курашиш ички назорат тузилмалари жорий этилди.

Коррупция хавф-хатарларини баҳолаш имконини берувчи электрон платформа, “Anti-Corruption Digest” онлайн журнали, анъанавий тарзда ўтказиб келинаётган Тошкент Аксилкоррупция форуми ҳам БМТ ТД кўмагида йўлга қўйилган энг муҳим лойиҳалардан саналади.

Мулоқотда икки томон ўртасида ана шундай мустаҳкам алоқаларни изчил давом эттириш ва келгусида ҳамкорликдаги лойиҳалар кўламини янада кенгайтириш масалалари юзасидан ўзаро фикр алмашилди.

Бу борада, хусусан, М.Димовска хоним Ўзбекистонда олиб борилаётган аксилкоррупция ислоҳотларининг муҳим натижаларини эътироф этган ҳолда коррупцияга қарши курашиш жараёнларига фуқаролик жамияти институтларини жалб этиш, фуқароларнинг ҳуқуқий билимини ошириш, ушбу иллатга қарши муросасизликни шакллантиришга қаратилган чораларни фаол давом эттириш зарурлигига алоҳида урғу бериб ўтди.

Учрашув якунида А. Бурханов Ўзбекистондаги фаолиятини якунлаётган М.Димовскага биргаликда амалга оширилган яқин ва салмоқли ҳамкорлик учун миннатдорчилик билдириб, келгусидаги ишларига муваффақиятлар тилади.

Коррупцияга қарши курашиш агентлиги

Ахборот хизмати