Joriy yilning 6-iyul kuni Korrupsiyaga qarshi kurashish agentligi direktori A.Burxanov BMT Taraqqiyot dasturi (BMT TD)ning O‘zbekistondagi vakili Matilda Dimovskani qabul qildi.

Uchrashuvda o‘tgan 3 yil davomidagi o‘zaro hamkorlik natijalari sarhisob qilinib, kelgusidagi reja va vazifalar yuzasidan o‘zaro fikr almashildi.

Aytish joiz, BMT TD Agentlik faoliyatining dastlabki davridanoq barcha muhim tashabbus va takliflarni qo‘llab-quvvatlab kelayotgan asosiy hamkorlardan biri sanaladi.

O‘tgan vaqt ichida birgalikdagi saʼy-harakatlar orqali bir qator samarali loyihalar amalga oshirilib, muhim natijalarga erishildi.

Jumladan, korrupsiyaga qarshi kurashish siyosatiga oid hujjatlar ishlab chiqildi, fuqarolarning murojaatlarini onlayn qabul qilish tizimi, davlat organlari va tashkilotlarida korrupsiyaga qarshi kurashish ichki nazorat tuzilmalari joriy etildi.

Korrupsiya xavf-xatarlarini baholash imkonini beruvchi elektron platforma, “Anti-Corruption Digest” onlayn jurnali, anʼanaviy tarzda o‘tkazib kelinayotgan Toshkent Aksilkorrupsiya forumi ham BMT TD ko‘magida yo‘lga qo‘yilgan eng muhim loyihalardan sanaladi.

Muloqotda ikki tomon o‘rtasida ana shunday mustahkam aloqalarni izchil davom ettirish va kelgusida hamkorlikdagi loyihalar ko‘lamini yana-da kengaytirish masalalari yuzasidan o‘zaro fikr almashildi.

Bu borada, xususan, M.Dimovska xonim O‘zbekistonda olib borilayotgan aksilkorrupsiya islohotlarining muhim natijalarini eʼtirof etgan holda korrupsiyaga qarshi kurashish jarayonlariga fuqarolik jamiyati institutlarini jalb etish, fuqarolarning huquqiy bilimini oshirish, ushbu illatga qarshi murosasizlikni shakllantirishga qaratilgan choralarni faol davom ettirish zarurligiga alohida urg‘u berib o‘tdi.

Uchrashuv yakunida A. Burxanov O‘zbekistondagi faoliyatini yakunlayotgan M.Dimovskaga birgalikda amalga oshirilgan yaqin va salmoqli hamkorlik uchun minnatdorchilik bildirib, kelgusidagi ishlariga muvaffaqiyatlar tiladi.

Korrupsiyaga qarshi kurashish agentligi

Axborot xizmati