Жорий йилнинг 10-13 июль кунлари Коррупцияга қарши курашиш агентлиги директори ўринбосари У.Мавлянов бошчилигидаги делегация амалий ташриф билан Малайзия давлатида бўлди.

Ташрифдан кўзланган асосий мақсад Малайзиянинг коррупциянинг олдини олиш ва унга қарши курашиш бўйича ваколатли идоралари билан ўзаро ҳамкорлик алоқаларини мустаҳкамлаш ҳамда қўшма лойиҳаларни амалга ошириш бўйича келишувларга эришиш ҳисобланади.

Ташриф доирасида Малайзия Коррупцияга қарши курашиш комиссияси (MACC) раиси Тан Сри Дато Сри Хожи Аъзам бин Баки билан учрашув ўтказилиб, унда Комиссия ҳамда Агентлик ўртасида 2022 йилда имзоланган идоралараро ҳамкорлик Меморандуми доирасида амалга оширилган ишлар сарҳисоб қилиниб, ўзаро самарали ҳамкорликни давом эттириш ҳамда амалга оширилаётган лойиҳалар кўламини кенгайтириш масалалари муҳокама қилинди.

Шунингдек, Ўзбекистон делегациясининг Transparency International (Малайзия) ташкилоти вакиллари билан бўлиб ўтган мулоқотида халқаро рейтингдаги кўрсаткичларни яхшилаш, коррупцияга қарши курашишга масъул ваколатли идоралар билан ўзаро ҳамкорлик қилиш усул ва йўллари хусусида фикр алмашилди.

Ўтказилган учрашувлар ҳамда муҳокамалар натижаларига кўра икки давлат ўртасида коррупцияга қарши курашиш бўйича ўзаро тажриба алмашиш кўламини кенгайтириш ҳамда янги қўшма лойиҳаларни амалга ошириш бўйича бир қатор келишувларга эришилди.

Коррупцияга қарши курашиш агентлиги

Ахборот хизмати