Joriy yilning 10-13 iyul kunlari Korrupsiyaga qarshi kurashish agentligi direktori o‘rinbosari U.Mavlyanov boshchiligidagi delegatsiya amaliy tashrif bilan Malayziya davlatida bo‘ldi.

Tashrifdan ko‘zlangan asosiy maqsad Malayziyaning korrupsiyaning oldini olish va unga qarshi kurashish bo‘yicha vakolatli idoralari bilan o‘zaro hamkorlik aloqalarini mustahkamlash hamda qo‘shma loyihalarni amalga oshirish bo‘yicha kelishuvlarga erishish hisoblanadi.

Tashrif doirasida Malayziya Korrupsiyaga qarshi kurashish komissiyasi (MACC) raisi Tan Sri Dato Sri Xoji Aʼzam bin Baki bilan uchrashuv o‘tkazilib, unda Komissiya hamda Agentlik o‘rtasida 2022 yilda imzolangan idoralararo hamkorlik Memorandumi doirasida amalga oshirilgan ishlar sarhisob qilinib, o‘zaro samarali hamkorlikni davom ettirish hamda amalga oshirilayotgan loyihalar ko‘lamini kengaytirish masalalari muhokama qilindi.

Shuningdek, O‘zbekiston delegatsiyasining Transparency International (Malayziya) tashkiloti vakillari bilan bo‘lib o‘tgan muloqotida xalqaro reytingdagi ko‘rsatkichlarni yaxshilash, korrupsiyaga qarshi kurashishga masʼul vakolatli idoralar bilan o‘zaro hamkorlik qilish usul va yo‘llari xususida fikr almashildi.

O‘tkazilgan uchrashuvlar hamda muhokamalar natijalariga ko‘ra ikki davlat o‘rtasida korrupsiyaga qarshi kurashish bo‘yicha o‘zaro tajriba almashish ko‘lamini kengaytirish hamda yangi qo‘shma loyihalarni amalga oshirish bo‘yicha bir qator kelishuvlarga erishildi.

Korrupsiyaga qarshi kurashish agentligi

Axborot xizmati